Ulet çmimi i energjisë elektrike për familjarët, çmimi i ri duke filluar nga shkurti

Enti Rregullator i Energjisë  ka vendosur uljen e çmimit të energjisë për konsumatorët familjarë, duke e përcaktuar atë në 8.5 lekë për kilovat orë (kWh) për ata që konsumojnë deri në 700 kWh në muaj. Ky vendim u miratua gjatë mbledhjes së mbajtur këtë të mërkurë nga ERE, pas shqyrtimit të kërkesës së Operatorit të Shpërndarjes së Energjisë Elektrike  për rregullimin e çmimeve.

Çmimi aktual i energjisë për konsumatorët familjarë ishte 9.5 lekë për kWh, ndërsa pas miratimit të këtij vendimi, çmimi do të ulet me 1 lek për kWh. Kjo ulje do të aplikohet për konsumatorët që konsumojnë deri në 700 kWh në muaj dhe do të jetë në fuqi për periudhën 1 shkurt – 31 dhjetor 2025.

Propozimi për uljen e çmimit u bë nga Drejtori i Tarifave në OSHEE, i cili deklaroi gjatë mbledhjes së ERE: “I propozojmë bordit të ERE-së miratimin e përcaktimit të shitjes për periudhën 1 shkurt 2025 – 31 dhjetor 2025 për konsumatorët familjarë që konsumojnë më pak se 700 kËh në muaj. Çmimi i energjisë aktive do të jetë 8.5 lekë për kWh. Për konsumatorët familjarë që konsumojnë më shumë se 700 kWh në muaj, çmimi për gjithë sasinë e konsumuar, duke filluar nga kilovati i parë, do të jetë 9.5 lekë për kWh”, tha Drejtori i Tarifave i OSHEE-së.

Ai gjithashtu shtoi se të gjitha çmimet për kategoritë e tjera të konsumatorëve do të mbeten të pandryshuara.

LEXONI GJITHASHTU:

• Belinda Balluku: Viti 2025 plot sfida, do ulim çmimin e energjisë
• Në shkurt ulet çmimi i energjisë! ERE shqyrton kërkesën: Kush përfiton