Rama: S’rrimë pa folur kur gjykata bëhet palë me prokurorinë për arrestime pa gjyq

Kryeministri Edi Rama zhvilloi pasditen e së mërkurës një takim me strukturat e Partisë Socialiste në Tiranë ku foli sërish për SPAK dhe GJKKO nisur nga arrestimi 2 javë më parë i kryebashkiakut Erion Veliaj.

Rama tha se arrestimi pa gjyq është i paligjshëm dhe këtë e  vërtetoi Gjykata e Strasburgut një ditë më parë me vendimin në favor të ish-drejtorit të TVSH të arrestuar nga SPAK disa kohë më parë.

Sipas kryeministrit, kjo është një kambanë alarmi për gjykatësit që nuk duhet të bëhet palë me prokurorinë dhe të japin masa arresti për njerëz që janë vetëm të dyshuar, jo të pandehur.

“Arrestim i pa gjyq është i paligjshëm, mjafton të shohësh këtë vendim të Strasburgut për të kuptuar sa shumë arrestime të paligjshme do paguajnë taksapaguesit shqiptarë. Pse duhet ta fusësh në burg? Për të treguar se je i fortë apo për të treguar se gjykata dhe prokuroria janë e njëjta gjë si në komunizëm? Është një kambanë alarmi për gjykatësit që janë aty për të qenë të paanshëm jo për të mbajtur anën e prokurorit dhe gjykatës që bëjnë marrëveshje apo kanë frikë nga ai dhe bien dakord të fusin njerëz pa gjyq në burg. S’ke pse e merr tjetrin peng, se nuk i ke ngritur akuzë si i pandehur”, tha Rama.

LEXONI GJITHASHTU:

• Rama me strukturat socialiste: Bëmë uljen e parë të çmimit të energjisë që nga 1990
• Gjyqi për shpifje me Gazment Bardhin, reagon Rama: Prova s’kanë dhe s’përdridhen