Rama takim me strukturat në Elbasan: PS të garantojë hegjemoninë në jetën politike

Kryeministri Edi Rama mori pjesë këtë të shtunë në një takim me organizatat e Partisë Socialiste në Elbasan.

Në fjalën e tij kryesocialisti tha përpara të pranishmëve se PS-së i nevojitet rienergjizimi i organizatave.

Ai shtoi se Partia Socialiste duhet të jetë në gjendje që të ruajë lidershipin dhe të garantojë hegjemoninë e vet në jetën politike shqiptare.

“Jo rastësisht unë erdha për të takuar dy organizata të Partisë Socialiste dhe jo vetëm drejtuesit, deputetët me të cilët takohemi zakonisht dhe po kështu do të shkoj në të gjithë Shqipërinë gjatë këtyre ditëve për të takuar organizatat socialiste.

Ne, falë faktit që kemi punuar seriozisht, falë faktit që jemi organizuar mirë, falë faktit që jemi angazhuar më shumë se të tjerët, kemi arritur diçka që në fillim, kur morëm këtë detyrë, dukej e pamundur. Kemi arritur që të marrim dy mandate me një shumicë të pavarur nga të tjerët.

Partia Socialiste duhet të jetë në gjendje që të ruajë lidershipin, të garantojë hegjemoninë e vet në jetën politike shqiptare.

Ne na duhet një rienergjizim i organizatës së Partisë Socialiste, në radhë të parë, dhe pastaj një rienergjizim i strukturave tona më lart dhe një rienergjizim i gjithë procesit qeverisës.

Ne, në 2025 duhet të marrim një fitore më të madhe sesa e mëparshmja”, tha Rama.

LEXONI GJITHASHTU:

• Zelensky kërkoi prodhimin e municioneve në Ballkan, Rama: Të gjithë i thamë po
• Plani i rritjes ekonomike, Rama: Platformë kyçe për përshpejtimin e hyrjes në BE