Edi Rama organizon mitingun përmbyllës të fushatës në Tiranë, shprehet i kënaqur me pjesëmarrjen e diasporës në zgjedhje

Kryesocialisti Edi Rama është gati për të finalizuar fushatën elektorale në ditën e fundit, ku pas pak do të mbajë mitingun përmbyllës në Tiranë, për të lënë rrugë për procesin e votimit më 11 maj.

Përmes një video-mesazhi në llogarinë e tij në Facebook, ai njoftoi tubimin e fundit të Partisë Socialiste, duke sqaruar se ai do të mbahet me pjesëmarrës vetëm nga qarku i Tiranës, pasi në qarqet e tjera ka nisur organizimi për fazën tjetër të procesit zgjedhor.

Në mesazhin e tij, Rama gjithashtu theksoi rritjen e numrit të votave të diasporës, duke e cilësuar këtë pjesëmarrje si “të lartë”. Ai shprehu kënaqësinë që për herë të parë iu dha mundësia shqiptarëve jashtë kufijve të votojnë dhe e konsideroi këtë një moment historik për Shqipërinë.

“Orët e fundit të këtij rrugëtimi erdhën pas pak, 19:30 kemi Tiranën, edhe vetëm Tiranën, se gjithë të tjerët kanë qëndruar nëpër qarqet e tyre për përgatitjet e fazës tjetër të procesit, organizimi, trupat e komisionerëve. Ndërkohë, që në 19:30, Tirana do të japë mesazhin e fundit të gjithë Shqipërisë dhe të gjithë shqiptarëve kudo që ata ndodhen”, tha Rama.

Kryeministri shprehu gjithashtu optimizmin për pjesëmarrjen e diasporës, duke shtuar se të dhënat e fundit janë inkurajuese dhe tregojnë një pjesëmarrje shumë të lartë, që sipas tij, është një tregues i qartë i angazhimit të shqiptarëve jashtë vendit për të marrë pjesë në këtë proces zgjedhor historik.

“Jam jashtëzakonisht i lumtur që ne i dhamë mundësinë të votojnë dhe jashtëzakonisht i lumtur që po e shfrytëzojnë këtë mundësi për votën e parë në histori të shqiptarëve jashtë”, tha Rama, duke shtuar se është kurioz për gjykimin e diasporës dhe do ta respektojë çdo vendim të saj.

Në fund të mesazhit të tij, ai përsëriti angazhimin për të ardhmen e Shqipërisë dhe për Bashkimin Europian, duke theksuar se është i gatshëm të punojë për një Shqipëri të fortë dhe të integruar në BE.