Raporti Greqi-Turqi, kryeministri Mitsotakis jep një mesazh në OKB

Kryeministri grek Kyriakos Mitsotakis mbajti fjalën e tij në Sesionin e 80-të të Asamblesë së Përgjithshme të OKB-së, ku adresoi sfida globale dhe rajonale, përfshirë marrëdhëniet me Turqinë, luftën në Ukrainë dhe krizën në Lindjen e Mesme.

Duke iu referuar komenteve të mëparshme të Presidentit turk Erdogan për të drejtat sovrane të Turqisë në Mesdhe dhe bashkëpunimin “Kazan-Kazakistan”, Mitsotakis u shpreh qartë:

“Ne kërkojmë dialog dhe paqe me fqinjët tanë, por nuk jemi naivë ndaj kërcënimeve.”

Në lidhje me konfliktin në Gaza, kreu i qeverisë greke theksoi përkushtimin e Greqisë për një zgjidhje të qëndrueshme:

“Greqia mbetet e përkushtuar ndaj procesit të paqes që do t’i ofrojë shpresë një rajoni që po vuan.”

Mitsotakis vlerësoi gjithashtu qëndresën e Ukrainës përballë agresionit rus, duke e cilësuar atë si një betejë për vlerat themelore të rendit ndërkombëtar:

“Rezistenca e Ukrainës nuk është vetëm një luftë mbijetese dhe sovraniteti territorial. Është një luftë për dinjitet, por edhe për të drejtën ndërkombëtare, për rregullat, paqen dhe sigurinë. Nuk ka formulë paqeje pa Ukrainën në tryezë.”

Ai vuri në dukje edhe rëndësinë e përfshirjes evropiane në çdo zgjidhje të mundshme, ndërsa përmendi përpjekjet e presidentit amerikan Donald Trump në këtë kontekst.

Në përmbyllje, Mitsotakis përshkroi rolin e Greqisë si një shtyllë stabiliteti në një mjedis gjeopolitik të brishtë, duke theksuar se sfidat që shtrihen nga Ukraina në Lindjen e Mesme kërkojnë përgjigje të përbashkëta dhe të koordinuara nga bashkësia ndërkombëtare.

LEXONI GJITHASHTU:

• VIDEO/ Netanyahu lexon fjalimin në OKB, boshatiset salla nga përfaqësuesit
• Netanyahu urdhëron transmetimin e fjalimit të tij nga OKB në të gjithë Gazan