Raporti i ”Transparency International”, PD: Korrupsioni është rritur për shkak të Ramës, ka lidhje me krimin

Ish-deputetët e Partisë Demokratike, Jorida Tabaku dhe Enkelejd Alibeaj kanë deklaruar se raporti i “Transparency International” konfirmoi se korrupsioni është rritur si rezultat i vullnetit politik të Edi Ramës që ka shkatërruar ekonominë dhe ka rritur kostot e jetesës.

Sipas tyre ky raport konfirmoi gjithçka që PD-ja ka denoncuar gjatë këtyre viteve në opozitë.

“Organizata e specializuar për këtë çështje, Transparency International ngre alarmin se gjatë qeverisjes së Edi Ramës në këto 7 vjet është ngritur një sistem korruptiv, që mund të konsiderohet si kapje e shtetit!

Transparency International tregon se korrupsioni është rritur si rezultat i vullnetit politik të Ramës, që ka shkatërruar ekonominë, ka rritur kostot e jetesës dhe na mban peng tek oligarkët dhe larg Bashimit Europian”, u shpreh Tabaku.

Ndërsa Alibeaj theksoi se raporti i Transparency International ka hedhur dritë edhe mbi anën më të errët të qeverisë së Edi Ramës, lidhjet e tij me krimin për të mbajtur pushtetin dhe për ta përdorur atë kundra qytetarëve.

“Në 7 vjet, Edi Rama nuk ka punuar për qytetarët. Ka punuar për veten dhe për organizata kriminale, të cilat e kanë ndihmuar të blejë vota, ndërsa qeveria e Edi Ramës u ka lehtësuar, fjala vjen, trafikun ndërkombëtar të drogës.

Raporti i Transprency International konfirmoi pikë për pikë gjithçka Partia Demokratike ka denoncuar gjatë këtyre viteve në opozitë”, tha Alibeaj. 

Lexoni gjithashtu:

”Transparency International” për kapjen e shtetit: Shqipëria dhe Turqia janë vendet ku ka më shumë ligje me porosi

Raporti i ”Transparency International”, Besar Likmeta: Kemi rënie të demokracisë dhe rritje të korrupsionit