Reagimet pas vendimit të Alibeajt, deputetët e PD: Arbitrar dhe i pakuptimtë

Vendimi i Alibeajt për të përjashtuar 4 deputetë nga grupi parlamentar demokrat ka shkaktuar reagime të forta. Janë disa deputetë që kanë reaguar për këtë vendim përmes rrjeteve sociale, por edhe në deklarata për mediet.

Edi Paloka e cilësoi këtë vendim si një heqje të maskës së Alibeajt që tregoi se punon për Ramën.

“Ky akt nuk di çfarë emri t’i vë, është vendim më se i turpshëm me një mungesë totale dinjiteti nga ai zotëria, por edhe politikisht është heqja përfundimtare e maskave”, tha Paloka.

Me tone të ashpra reagoi për këtë vendim edhe Ferdinand Xhaferraj, që theksoi se nuk ka pasur asgjë me deputetët e tjerë.

“Tregon për maskaradën e këtij vendimi, unë jam marrë dhe do vazhdoj të merrem me qeverinë, ka kolegë të tjerë që duan të merren brenda opozitës, kjo flet shumë për ta”,  u shpreh Xhaferraj.

Ndërsa deputetja e Divjakës, Ilda Dhori në një intervistë në Euronews Albania tha se vendimi i Alibeajt është i pakuptimtë që i shërben veç përçarjes më tej të PD.

“Qartësisht është një vendim që si përket grupit të PD, por ndoshta vendim i një numri të kufizuar deputetësh, që është arbitrar dhe i pakuptimtë në këtë situatë ku ndodhemi sot”, tha deputetja e PD.

Përveç ndarjes në dy palë, ditët e fundit janë vënë re disa deputetë që janë shfaqur si të distancuar dhe me qëndrime të pavarura nga të dyja palët.

LEXONI GJITHASHTU:

• ‘Zbatonjës mjeran i urdhrave të Ramës’, Berisha i përgjigjet Alibeajt për shkarkimet
• Shehu për përjashtimin nga Grupi Parlamentar: Alibeajt i duket vetja Kim Jong Un