Reagon Gjykata e Korçës: Pse i liruam dy të akuzuarit për vrasjen e Egli Progës

Gjykata e Korçës ka reaguar në lidhje me lirimin e dy personave të akuzuar për vrasjen e Egli Progës në Pogradec.

Në reagimin e saj, gjykata sqaron se lirimi i Leonidha Guçes dhe Denis Meçes erdhi për shkak të përfundimit të afateve të paraburgimit.

“Gjykata ka konstatuar se afatet e paraburgimit, lidhur me masat e sigurimit personal të caktuara për ta (D.M. ‘Arrest në burg’, L.G. ‘Arrest në burg’, V.Sh. ‘Arrest në shtëpi’), edhe pas zgjatjes së tyre sipas periudhës së parashikuar nga ligji procedurial penal (neni 264), kanë përfunduar”, njofton Gjykata e Korçës.

“Në vijim, mbi bazën e kërkesës së Prokurorisë pranë Gjykatës së Shkallës së Parë të Juridiksionit të Përgjithshëm Korçë, gjykata, pasi ka konstatuar humbjen e fuqisë së paraburgimit për shkak të kalimit të afateve ligjore të parashikuara nga Kodi i Procedurës Penale, ka caktuar për ta masa të tjera sigurimi (të ndryshme nga ato për të cilat ka kaluar afati i paraburgimit). Konkretisht: për personin nën hetim D.M. ka caktuar masën e sigurimit personal ‘Arrest në shtëpi’, për personin nën hetim L.G. ka caktuar masën e sigurimit personal ‘Arrest në shtëpi’, dhe për personin nën hetim V.Sh. ka caktuar masën e sigurimit personal ‘Detyrim për t’u paraqitur në Policinë Gjyqësore’ dhe ‘Ndalim të daljes jashtë shtetit’”, thuhet në njoftim.

Pesëmbëdhjetë muaj pas vrasjes së Egli Progës në Pogradec, asnjë prej pesë të akuzuarve nuk ndodhet në qeli.

Tre ditë më parë, kanë lënë paraburgimin edhe dy të dyshuarit për vrasje, Leonidha Guçe dhe Denis Meçe, të cilët dolën nga qelia pasi Prokuroria e Korçës shkeli afatet, dhe gjyqtarja Luljeta Kole caktoi ndaj tyre masën “arrest shtëpie” deri në përfundimin e hetimeve.

Ndërkohë, Arjan Manellari, Voltan dhe Andi Shkulaku, të akuzuar për moskallëzim krimi, janë në masën “detyrim paraqitjeje”.

LEXONI GJITHASHTU:

• Vrasja e Egli Progës, Gjykata e Korçës liron nga burgu 2 autorët e dyshuar
• Dëshmia e re ndryshon rrjedhën e hetimeve për Egli Progën, lihet në burg Shkullaku