Reagon kirurgu për gjendjen e të miturit të plagosur me thikë në Durrës

Ka reaguar kirurgu që po ndjek nga afër gjendjen e të miturit të plagosur gjatë një sherri mes gjimnazistëve në Durrës. I riu, nxënës i gjimnazit “Dom Nikoll Kaçorri”, u godit disa herë me thikë nga bashkëmoshatari i tij dhe u transportua me urgjencë në spital në gjendje të rëndë, pasi kishte humbur shumë gjak.

Kirurgu Fitim Shini bëri me dije se situata mbetet kritike:

“Për momentin pacienti ndodhet në reanimacion, i intubuar, dhe gjendja vazhdon të jetë e rëndë. Shpresoj që në 24/48 orët e ardhshme gjendja të stabilizohet dhe të dalë nga reanimacioni.”

Ai sqaroi se i mituri ka pësuar disa plagë të thella, përfshirë edhe një që ka prekur zonën e zemrës:

“Fëmija erdhi në urgjencë me disa plagë, 4 plagë në rajonin e gjoksit, ku njëra prej tyre depërtonte në zonën e zemrës dhe ka shkaktuar gjendjen e rënduar.”

Sipas mjekut, i riu ka marrë disa njësi gjaku, por gjendja vazhdon të mbetet delikate:

“Aktualisht ka marrë 3 flakone gjak dhe për momentin gjendja vazhdon të jetë e rëndë në reanimacion. Shpresojmë që në orët në vijim situata të përmirësohet.”