Reforma në Drejtësi, Anastasi: Ekspertët punojnë, politikanët zgjedhin

Konstitucionalistja Aurela Anastasi deklaroi se çështja e reformës në drejtësi është shumë komplekse.

Në emisionin “Barometri” në Euronews Albania, Anastasi u shpreh se ekspertët punuan me alternativa për këtë reformë, por nënvizoi se janë politikanët që zgjedhin.

“Kjo çështja e reformës është çështje shumë komplekse. Nëse duam të gjejmë problemin tek mënyra si u ngritën institucionet, nëse ishte problemi te ekspertët apo politika, duhen parë të gjitha detajet. Ne prodhuam disa formula të tjera dhe në fund i pamë të tjetërsuara. Nuk i kishim bërë propozimet ashtu si dolën ne fund. Politika jonë përdor diskurs të fortë, ekspertët punojnë me alternativa, politikanët përzgjedhin”, theksoi ajo.

Pavarësisht mbështetjes së ndërkombëtarëve, Reforma në Drejtësi nuk ua ka kthyer shqiptarëve besimin tek drejtësia. Të pyetur nga Barometri në Euronews Albania se si funksionon drejtësia sot krahasuar me 5 vite më parë, 35.4% e tyre mendojnë se asgjë nuk ka ndryshuar.

Ndërsa 28.1% e tyre janë shprehur se sistemi jonë i drejtësisë është përkeqësuar. 6.7% e të pyeturve mendojnë se drejtësia është shumë me keq se sa ka qenë 5 vite më parë.

Vetëm 27.3% e të pyeturve mendojnë se sistemi i drejtësisë me reformimin është më mirë. Ndërsa shumë më mirë mendojnë vetëm 0.1%, një shifër shumë e ulët.

LEXONI GJITHASHTU

• Ylli Manjani: Drejtësia sot është shumë më keq, korrupsioni u thellua
• Shqiptarët të zhgënjyer nga Reforma në Drejtësi
• Barometri konfirmon: Pushimet luks për shqiptarët