Reforma Territoriale dhe Zgjedhore/ Zbardhen projektvendimet, zgjatja vetëm 9 muaj

Janë zbardhur dy projektvendimet për ngritjen e komisioneve të posaçme për reformën zgjedhore dhe reformën administrativo-territoriale, të cilat pritet të miratohen gjatë mbledhjes së kësaj të mërkure të Konferencës së Kryetarëve.

Sipas dokumentit, Komisioni i Posaçëm për Reformën Zgjedhore propozohet të ngrihet mbi bazën e barazisë mes pozitës dhe opozitës. Ai do të përbëhet nga 16 anëtarë 8 përfaqësues nga Partia Socialiste dhe 8 të tjerë nga partitë e tjera parlamentare.

Komisioni do të drejtohet nga dy bashkëkryetarë, një përfaqësues i Partisë Socialiste dhe një i Partisë Demokratike, duke synuar garantimin e një procesi gjithëpërfshirës dhe konsensual.

Megjithatë, në një variant tjetër të përbërjes, Komisioni i Reformës Zgjedhore parashikohet të ketë gjithsej 17 anëtarë:

1. 9 përfaqësues nga Grupi Parlamentar i Partisë Socialiste
2. 6 përfaqësues nga Grupi Parlamentar i Partisë Demokratike
3. 1 përfaqësues nga Grupi Parlamentar “Aleanca për Ndryshim”
4. 1 përfaqësues nga Grupi Parlamentar i Partisë së Lirisë

Në këtë skemë, drejtimi i Komisionit do t’i takojë një përfaqësuesi të shumicës parlamentare, ndërsa zëvendëskryetari do të jetë nga radhët e pakicës parlamentare.

Komisioni i Posaçëm për Reformën Administrativo-Territoriale

Edhe për këtë komision, pritet të aplikohet një formulë e ngjashme përbërjeje dhe drejtimi, duke garantuar përfaqësimin e të gjitha forcave politike parlamentare.

Mandati i të dy komisioneve

Të dy komisionet e posaçme parashikohet të kenë një mandat 9-mujor, brenda të cilit do të duhet të përmbyllin propozimet dhe rekomandimet përkatëse.

Miratimi i projektvendimeve pritet të ndodhë në mbledhjen e sotme të Konferencës së Kryetarëve, çka do të shënojë hapin e parë drejt një procesi të ri reformash në sistemin politik dhe administrativ të vendit.

LEXONI GJITHASHTU:

• Konferenca e Kryetarëve/ Bardhi-Peleshit: Se e mban dot atë karrige, lërojani Ballës
• Balla-Opozitës në Konferencën e Kryetarëve: Kur flisni ju, ne nuk pipëtijmë