Rekomandimet për prokuroritë në 2026, Gogu: Fokus te evazioni fiskal, krimi kibernetik dhe siguria rrugore

Ministri i Drejtësisë, Toni Gogu, prezantoi këtë të martë rekomandimet e Ministrisë së Drejtësisë për vitin 2026 para Prokurorit të Përgjithshëm, drejtuesit të SPAK dhe drejtuesve të prokurorive në vend, duke vënë theksin te sfidat e reja që lidhen me kriminalitetin modern dhe nevojën për forcimin e kapaciteteve të sistemit të drejtësisë.

Gjatë fjalës së tij, Gogu u ndal veçanërisht te krimi kibernetik, duke theksuar se grupet kriminale po përdorin gjithnjë e më shumë teknologjinë për aktivitete të paligjshme, përfshirë pastrimin e parave përmes kriptomonedhave, mashtrimet online dhe sulmet ndaj infrastrukturave publike.

“Kriminaliteti ka evoluar me shpejtësi të pazakontë. Pastrimi i parave bëhet në kriptovaluta, mashtrimet organizohen online, ndërsa grupet kriminale përdorin teknika gjithnjë e më të sofistikuara komunikimi dhe veprojnë në disa juridiksione njëkohësisht”, deklaroi ministri.

Gogu renditi tre prioritetet kryesore të rekomandimeve për vitin e ardhshëm. Në krye të tyre është lufta kundër evazionit fiskal, të cilin e cilësoi si një kërcënim për rendin ekonomik dhe konkurrencën e ndershme. Prioriteti i dytë lidhet me goditjen e krimit kibernetik dhe formave të reja të pastrimit të parave, ndërsa i treti është kriminaliteti rrugor, me fokus drejtimin e mjeteve pa leje dhe në gjendje të dehur.