Rekord blerjesh në Premier League, arrihet vlera e 2 miliardë eurove

Premier Liga angleze ka vendosur një rekord sa i përket merkatos së kësaj vere, duke kaluar vlerën e 2 miliardë eurove. Skuadra që ka shpenzuar më së tepërmi është Liverpuli.

Skuadrat e Premier League angleze nuk janë kursyer as këtë merkato verore, duke vendosur një rekord sa i përket shpenzimeve në 5 ligat kryesore evropiane. Të udhëhequr nga Liverpool, ekipet në ishull kanë shpenzuar deri më tani, ku ka ende ditë në dispozicion, plot 2 miliardë euro.

Një shifër realisht e lartë, e cila nuk mund të konkurrohet nga asnjë kampionat tjetër, qoftë La Liga ku marrin pjesë Real Madrid apo Barcelona, por as nga Italia me skuadra si Milani, Interi, Napoli e Juventusi, për të mos përmendur këtu Bundesligën, ku i vetmi ekip që hodhi para është Bayern, me blerjen e Diaz.

Sa i përket Anglisë, Liverpool qëndron në krye të listës së ekipeve që kanë investuar më së tepërmi, me 269 milionë paundë blerje, ku më e shtrenjta është ajo e Florian Wirtz nga Leverkusen e pas tij Ekitike. Në vendin e dytë është Chelsea me 212 milionë paundë, Arsenal 137 dhe Manchester United 135. Nuk ngelen pas as Man City dhe Tottenham, teksa në nisje të sezonit të ri edhe skuadra e sapongjitur Sunderland po investon goxha para.

Vera e 2023 është ajo e cila shënoi vlerën më të lartë të shpenzimeve bërë nga ekipet angleze, ku në total u arrit 2.81 miliardë euro.

LEXONI GJITHASHTU:

• Granit Xhaka rikthehet në Premier League, firmos me Sunderland
• Granit Xhaka drejt rikthimit në Premier League