Rekursi i Metës për masën e sigurisë, kur do të mbahet seanca në Gjykatën e Lartë

Gjykata e Lartë ka caktuar datën 16 tetor për shqyrtimin e rekursit të ish-presidentit Ilir Meta, në lidhje me zëvendësimin e masës së sigurisë.

Fillimisht, seanca në dhomë këshillimi ishte parashikuar të mbahej të enjten, në orën 10:00, por për shkak të mbledhjes së gjyqtarëve në Këshillin e Lartë Gjyqësor, ajo është shtyrë për javën e ardhshme.

Relatore e rekursit është zgjedhur Albana Boksi, ndërsa anëtarët e trupës gjykuese janë Sokol Binaj dhe Medi Bici.

Ilir Meta kërkon në Shkallën e Tretë të gjyqësorit prishjen e vendimeve të GJKKO-së dhe Apelit të GJKKO-së, të cilat kanë lënë në fuqi masën e sigurisë me arrest në burg.

Ish-presidenti mbahet në qeli që prej tetorit të vitit të kaluar, pasi dyshohet nga Prokuroria e Posaçme se ka konsumuar veprat penale: “Korrupsion pasiv”, “Pastrim parash” dhe “Fshehje të pasurisë”.

LEXONI GJITHASHTU:

• Ilir Meta mbetet në burg, GJKKO rrëzon kërkesën për zbutje të masës së sigurisë
• GJKKO zbardh vendimin përse u la në burg ish-Presidenti Ilir Meta