Reshjet e shiut shkaktojnë kaos në Durrës, rrugët “zhyten” nën ujë

Reshjet e shumta të shiut gjatë natës, pore dhe mëngjesin e sotëm, kanë shkaktuar përmbytje të shumta në qytetin e Durrësit.

Sipas gazetares së EuroNews Albania në këtë qytet, reshjet kanë krijuar vështirësi të shumta në qarkullimin e mjeteve dhe të këmbësorëve, sidomos në orët e para të mëngjesit, kur fëmijët duhet të shkonin në shkollë.

Po ashtu sipas gazetares, masat e marra nga ana e institucioneve përkatëse dhe Bashkisë kanë qenë të pakta ose inekzistente.

“Durrësi si në çdo ditë me shi, është zgjuar edhe mëngjesin e sotëm, me rrugë të përmbytura. Niveli i ujit në rrugë është rritur dukshëm, duke shkaktuar edhe vështirësi në qarkullimin e mjeteve dhe këmbësorëve.

Reshjet kanë nisur sërish dhe pritet që të kemi një situatë ndoshta më problematike. Në orët e mëngjesit, u pa një situatë dramatike, kishte prindër që kalonin nga njëra anë e rrugës në tjetrën, me vijat e bardha të zhdukura, pasi ishin zhytur nën ujë. Ka qenë situatë kaotike edhe për automjetet, të cilat kanë patur frikën e tyre për hapjen e pusetave, për largimin e ujit.

Nuk ka pasur masa të ndërmarra, që kanë rezultuar në një situatë jo të këndshme. Ne shohim të njëjtën situatë dhe duket se instancat nuk kanë marrë përgjegjësinë e duhur. Vetë kryebashkiakja Emirjana Sako, veç apelit që qytetarët të mos kryejnë lëvizje të panevojshme, nuk ka marrë asnjë masë tjetër. Ka pasur apele jo vetëm që nuk vijnë në ndihmë, por janë edhe të pakuptueshme”, është shprehur gazetarja.

LEXONI GJITHASHTU:

• Stuhi dhe reshje/ Përmbytet qyteti i Vlorës, bllokohen rrugët e pezullohet lundrimi
• Moti i keq në Shqipëri: Përmbytje në Durrës, thyhet pema mbi makina në Shkodër