Reshjet, Rama shkon në Durrës: Mbeten problem disa pika në zonën e ish-kënetës

Kryeministri Edi Rama po zhvillon një vizitë në Bashkinë e Durrësit për të ndjekur nga afër situatën që është krijuar për shkak të reshjeve.

Rama në një postim që ka bërë në rrjetet sociale shkruan se prurjet e reshjeve janë frenuar nga argjinatura e ndërtuar pas përmbytjeve të mëparshme.

Kreu i qeverisë thotë se mbeten problem disa pika të veçuara në zonën e ish-kënetës, ku ndërtimet pa leje janë bërë nën kuotë dhe sipas tij është e vështirë shmangia e pranisë së ujit në disa shtëpi.

“NË Durrës (çka s’do t’jua tregonin kurrë përndryshe në kanale e portale) falë punës së palodhur të kryetares së bashkisë janë shëruar pjesa dërrmuese e pikave të mbetura problematike nga e shkuara, siç është edhe zona e Sukthit të Ri, ku prurjet u frenuan nga argjinatura e ndërtuar pas përmbytjeve të mëparshme

Mbeten problem disa pika të veçuara në zonën e ish-kënetës, ku ndërtimet pa leje janë bërë nën kuotë dhe ku rezulton tejet e vështirë shmangia e pranisë së ujit në disa dhjetëra shtëpi, në rast reshjesh të dendura”- shkruan Rama.

Më vonë Rama pritet të shkojë dhe në Lezhë. Sakaq pak më parë në një deklaratë për mediat deputeti i PD-së Enkelejd Alibeaj i bëri thirrje qeverisë që të shpallë gjendjen e fatkeqësisë natyrore në Durrës, Lezhë e Shkodër.

Shqipëria prej tre ditësh është përfshirë nga reshjet e dendura të shiut, ku situata më problematike ka qenë në Shkodër.

Si pasojë e motit të keq dy persona në Malësi të Madhe humbën jetën mesditën e së dielës pasi makina me të cilën po udhëtonin u mor përpara nga rrjedha ujit.

Ndërkohë në Durrës problematike paraqitet situata në zonën e ish-Kënetës, ku ditën e djeshme uji u fut deri në katet e para të banesës.

LEXONI GJITHASHTU: 

• Drejtori i KESH-it tregon arsyet pse u ble energji nga jashtë në prag të reshjeve
• Energji përmes wireless, projekti i Agjencisë Hapësinore Europiane