Rey Manaj nënshkruan me klubin e Emirateve, Al Sharjah prezanton sulmuesin shqiptar

Rey Manaj është zyrtarisht futbollisti më i ri i skuadrës Al Sharjah në Emiratet e Bashkuara Arabe, me të cilën ka firmosur një kontratë dyvjeçare.

Me këtë transferim, sulmuesi shqiptar largohet përfundimisht nga kampionati turk dhe nis një aventurë të re në karrierë.

Pak orë më parë u bë edhe prezantimi zyrtar i tij, ndërsa nënshkrimi u publikua në faqen zyrtare të klubit.

Euronews Albania kishte raportuar më herët ekskluzivisht për arritjen e marrëveshjes mes Manajt dhe skuadrës nga Emiratet.

28-vjeçari do të përfitojë një pagë prej 3.5 milionë euro në sezon, ndërsa kartoni i tij u ble për 2.5 milionë euro nga Sivasspor.

Klubi turk ka ruajtur 10% të të drejtave, në rast të një shitjeje të ardhshme të sulmuesit.

Manaj është një lojtar me përvojë, pasi ka luajtur në disa kampionate të ndryshme evropiane.

Në fillimet e karrierës ka veshur fanellën e Interit dhe Barcelonës, megjithëse ato eksperienca nuk rezultuan të suksesshme.

Në vitin 2023, ai u transferua në Superligën turke, ku në dy sezone zhvilloi 60 ndeshje dhe shënoi 30 gola.

LEXONI GJITHASHTU:

• EKSKLUZIVE/ Rei Manaj transferohet në kampionatin arab, firmos kontratën e majme
• Rei Manaj drejt Sharjah FC, sulmuesi i Kombëtares me një nga pagat më të larta