Rezoluta e Rithemelimit të PD: Votojmë vetëm për President konsensual

Këshilli Kombëtar i Partisë Demokratike në rezolutën e miratuar këtë të premte shprehet se, do të votojë në Parlament vetëm për një President të ri konsensual.

PD ka mandatuar Komisionin e Përkohshëm të Rithemelimit të Partisë Demokratike që të caktojë përfaqësuesit për gjetjen e një qëndrimi të përbashkët me partitë e tjera opozitare.

Në rezolutë thuhet se opozita do të votojë vetëm nëse arrihet pakt për zgjedhjen e një presidenti konsual të propozuar nga opozita.

“Çdo alternativë që mundëson zgjedhjen e Presidentit me votat e Partisë Socialiste, apo të siguruara pa konsensus politik të vërtetë, do të refuzohet me votë në Kuvend”, thekson rezoluta.

Duke iu referuar raportit të OSBE/ODIHR-it dhe DASH-it, sipas rezolutës së PD, legjitimiteti i shumicës qeverisëse është vënë në pikëpyetje, duke kërkuar që të zgjidhet një president konsensual siç u veprua në vitin 2002.

Nga ana tjetër, PD akuzon se “mazhoranca socialiste po përpiqet të krijojë një proces parlamentar farsë dhe politikisht steril duke u përpjekur t’i caktojë ajo përfaqësuesit e opozitës në procesin e zgjedhjes së Presidentit”.