Riaktivizohen disa vatra zjarri në Gramsh, ja ku paraqitet rreziku më i madh

Në fshatrat e njësisë administrative Skënderbegas, bashkia Gramsh, vazhdojnë operacionet për shuarjen e zjarreve të rëna më 12 gusht 2025.

Forcat operacionale janë angazhuar në mbajtjen nën kontroll të vatrave të vogla, për të parandaluar përhapjen e flakëve. Një vatër e mbetur aktive në Malin e Koshnicës po mbahet në monitorim nga Shërbimi Pyjor dhe banorët e zonës.

Dita e djeshme ka sjellë riaktivizime të zjarrit në disa fshatra, përfshirë Bletëz dhe Kullollas, ku forcat zjarrfikëse kanë arritur të shuajnë flakët duke përdorur mjete dhe burime të tjera. Rreziku ka qenë më i madh në Kullollas, ku një masiv pishash ishte në kërcënim. Megjithatë, situata është stabilizuar përkohësisht.

Në njësinë administrative Kukur, bashkia Gramsh, vatra e zjarrit në vendin e quajtur “Teqeja e Dushkut” vazhdon të jetë aktive. Pavarësisht vështirësive për shkak të terrenit malor dhe shtresave të humusit që bëjnë të vështirë shuarjen, situata është duke u monitoruar dhe ka filluar izolimi i vatrës. Përpjekjet për të kontrolluar këtë vatër përfshijnë 2 automjete zjarrfikëse, 10 efektivë, fadroma dhe forca bashkiake, të cilat janë angazhuar në terren për të frenuar përhapjen e flakëve.

Forcat operacionale dhe strukturat e emergjencës mbeten të angazhuara për të monitoruar situatën dhe për të parandaluar çdo riaktivizim të mundshëm.