Rikthehet magjia e Champions League, dy supersfidat e para në çerekfinale

Faza çerekfinale e Champions League fillon mbrëmjen e sotme me dy ndeshje të mëdha në Gjermani dhe Angli. Në Allianz Arena, Bajerni pret Interin, ndërsa kampionët në fuqi të Real Madrid udhëtojnë drejt Londrës për t’u përballur me Arsenalin.

Kompeticioni më spektakolar për klube rikthehet këtë të martë me fazën çerekfinale, ku në fushë zbresin 4 skuadra pretendente për fitimin e trofeut. Ndeshjet do të luhet paralelisht në Gjermani dhe Angli, me fokus në Emirates dhe Allianz Arena. Kampionët në fuqi të Real Madrid, të udhëhequr nga Carlo Ancelotti dhe me një formë të luhatur këtë sezon, do të sfidojnë Arsenalin, që ndeshjen e parë e luan në shtëpi. Një përballje që pritet të dhurojë spektakël.

Në të dyja skuadrat do të mungojnë disa lojtarë kyç. Te londinezët do të jenë të pamundur për t’u paraqitur Calafiori, Gabriel, Jesus, Havertz, Sterling dhe Tomiyasu, ndërsa te galaktikët e Realit, mungesat përfshijnë Carvajal, Ceballos, Militao, Lunin, Mendy dhe Tchouameni. Ky do të jetë takimi i tretë mes dy skuadrave në Champions League, me dy të mëparshmet që kanë përfunduar me një fitore për Arsenalin dhe një barazim pa gola.

Në të njëjtën kohë, në Allianz Arena, Bayern do të presë Interin në një duel të karakterizuar nga mungesat e shumta për të dyja ekipet. Bayern do të luajë pa 8 futbollistë, përfshirë 5 titullarë si Neuer, Upamecano, Davies, Musiala dhe Coman. Nga ana tjetër, skuadra e Simone Inzaghit do të përballet pa Dumfries, Taremi dhe Zielinski. Ky është takimi i tetë mes këtyre dy ekipeve, ku Bayern ka regjistruar 4 fitore, 1 barazim dhe 2 humbje.