Gazetarja shqiptare në Itali, Alba Kepi, foli këtë të premte mbi zhvillimet e fundit mbi hetimet për vrasjen e shqiptares Ilaria Sula nga ish-i dashuri i saj Mark Antony Samson.

Gazetarja tha se këtë të premte zhvillohet një seancë e gjatë e marrjes në pyetje të autorit filipinas, i cili e ka pranuar krimin.

Por pyetjet mbeten nëse në këtë krim të rëndë ai ka pasur ndihmën e prindërve të tij, të cilët kanë qenë në banesë në momentin kur ai ka vrarë ish-të dashurën shqiptare.

“Marc Anthony Samson po merret sërish në pyetje sot. Pyetjet janë nëse vrasja ka qenë e paramenduar apo momentale, siç ka deklaruar ai. Ai ka thënë se Ilaria ka marrë një mesazh në Tinder që ka shkaktuar zemërimin e tij, duke bërë që të marrë thikën dhe ta godasë për vdekje. Ekspertiza mjeko-ligjore thotë se vajza ka ndërruar jetë brenda një minute, ndërsa ka disa plagë të tjera në krah që nënkupton se mbase ajo është përpjekur të mbrohet.”

“Për pyetjet e hetuesve, nëse ka pasur ndihmën e babait në transportimin e trupit, ai është munduar t’i lërë jashtë kësaj ngjarjeje prindërit e tij, duke thënë se ata nuk kanë lidhje me ngjarjen.”

“Thuhet se filipinasi është munduar të shfajësojë prindërit, por disa pyetje mbeten, pasi automjeti që ka përdorur ai ishte në pronësi të babait të tij. Mbeten pyetjet nëse ka qenë i aftë të transportojë trupin vetëm, dhe nëse provat në banesë, si gjaku, janë pastruar me ndihmën e prindërve të tij. Por nëse prindërit do të ishin në dijeni ose ta kishin ndihmuar atë, do t’i bënte automatikisht bashkëpunëtorë në vrasje”, tha gazetarja Kepi.

“Ai nuk e pranon se vrasja ka qenë me paramendim. Sipër ligjislacionit italian, nëse vërtetohet se vrasja ka qenë me qëllim, dënimi mund të jetë deri në burgim të përjetshëm”, tha Kepi.

LEXONI GJITHASHTU:

• Babai i Ilarias tregon takimin me vrasësin e vajzës në polici: U shpreh i pikëlluar
• Gazetarja shqiptare në Itali: Si u zbulua vrasja e Ilaria Sulës nga filipinezi