Në një konferencë shtypi, të mbajtur në kuadër të sesionit vjetor të legjislaturës kineze, shefi i ri i diplomacisë së Pekinit paralajmëroi mundësinë e një konflikti me Shtetet e Bashkuara dhe i cilësoi si “të papranueshme” kërcënimet ndaj vendit të tij për qëndrimin ndaj pushtimit rus të Ukrainës.

“Nuk e prodhoi Kina krizën. Ajo nuk është as pjesë e krizës dhe as i ofroi armë ndonjërës prej palëve të përfshira në konflikt. Përse ia atribuojnë fajin Kinës dhe e kërcënojnë me vendosjen e sanksioneve? Kjo është tërësisht e papranueshme”, tha Qin Gang, ministër i Jashtëm i Kinës.

Ministri i Jashtëm mbrojti miqësinë e ngushtë mes Kinës dhe Rusisë dhe tha se, nëse dy vendet punojnë së bashku, atëherë bota do të ketë një “forcë udhëheqëse”.

Ai paralajmëroi gjithashtu se Kina dhe Shtetet e Bashkuara do të shkojnë drejt konfliktit nëse Uashingtoni nuk ndal përpjekjet për ta asgjësuar gjigantin aziatik.

“Nëse Amerika nuk ndalet, por vijon të ecë me shpejtësi në shtegun e gabuar, asgjë s’mund ta ndalë daljen nga shinat dhe do të ketë konflikte dhe përballje. Kush do t’i bartë pasojat katastrofike?” u shpreh Gang.

Shefi i diplomacisë kineze i bëri thirrje Uashingtonit që të mos ndërhyjë në çështjen e Tajvanit dhe shtoi se Pekini ka të drejtë të marrë masa nëse ishulli shpall pavarësinë.