Rrezikuan të mbyteshin në det, policia kufitare shpëton jetën e tre personave

Policia kufitare ka arritur të shpëtojë 3 persona të cilët rrezikuan të mbyteshin ndërsa ishin në det. Dy prej tyre janë shpëtuar ndërsa ishin në plazhin e Shëngjinit.

Ata rrezikuan të mbyteshin pasi mjetet e tyre lundruese, pedalonët, ishin larguar shumë për shkak të erës. Menjëherë pas thirrjes për ndihmë u bë e mundur kërkimi e më pas shpëtimi i tyre.

Një tjetër person u shpëtua në plazhin e Velipojës, pasi ky i fundit po shfaqte vështirësi të dilte në breg për shkak të dallgëve të larta.

Njoftimi i policisë:

-Shërbimet e Policisë Kufitare Shëngjin iu shkojnë në ndihmë 2 shtetasve që rrezikuan të mbyteshin pasi mjetet e tyre lundruese (pedalone) ishin larguar shumë nga bregu, për shkak të erës së fortë.

Pas marrjes së njoftimit se 2 shtetas që po lundronin me pedalone, në plazhin e Shëngjinit, ishin në rrezik sepse për shkak të erës së fortë kishin humbur kontrollin mbi mjetet lundruese dhe ishin larguar shumë nga bregu, shërbimet e Policisë Kufitare kanë nisur menjëherë kërkimet për gjetjen e tyre.

Pas kërkimeve me mjetin lundrues të Policisë Kufitare, janë konstatuar rreth 3 milje larg bregut, 2 mjetet lundruese pedalone dhe 2 drejtuesit e tyre.

Shërbimet e Policisë Kufitare i kanë nxjerrë në breg këta 2 shtetas, bashkë me mjetet e tyre lundruese. 2 shtetasit falënderuan punonjësit e Policisë që i shkuan në ndihmë.

Shërbimet e Policisë Kufitare Shkodër i kanë shkuar në ndihmë një shtetasi që ishte në rrezik mbytjeje për shkak të dallgëve të larta, në plazhin e Velipojës. Pas ndërhyrjes së shpejtë, shërbimet e Policisë e kanë nxjerrë në breg këtë shtetas dhe i kanë dhënë ndihmën e parë. Ai ka falënderuar punonjësit e Policisë, për ndërhyrjen e shpejtë dhe ndihmën që i ofruan.

LEXONI GJITHASHTU:

• Rrezikuan të mbyteshin në det , policia kufitare shpëton jetën e tre personave
• Përfshihet nga flakët kisha e Shën Marenës, pëson djegie në fytyrë roja i objektit