Rriten pagat në shtet, përfitojnë 135 mijë punonjës të administratës

Nga muaji korrik, 135 mijë punonjës të administratës shtetërore do të marrin paga më të larta. Me vendimin e miratuar nga Këshilli i Ministrave, paga mesatare në sektorin shtetëror pritet të arrijë në 105 mijë lekë.

“Nga kjo politikë, pritet të përfitojnë punonjës të sistemit shkollor parauniversitar, punonjësit e sistemit shëndetësor, punonjësit e sistemit të sigurisë së vendit”,-tha Ervin Mete, ministër i financave.

Vendimi synon të krijojë një administratë më të qëndrueshme, ku pothuajse të gjithë punonjësit do të marrin shtesa nga  7 deri në 35%, ndërsa në vazhdimësi të punës së tyre, pagat do të indeksohen në mënyrë periodike.

“Me ndryshimet ligjore të miratuara parashikohet indeksimi i të gjitha pagave në administratat publike, indeksim i cili do të realizohet në vazhdimësi për çdo dy vite dhe siguron që rritja e pagave të jetë vijuese me normën e inflacionit”,-tha Ervin Mete.

Buxhetit do të paguajë rreth 11 mld lekë në pjesën e mbetur të vitit për shtesat në pagë, ndërsa kosto e llogaritur për dy vendimet e firmosura vitin e kaluar dhe sot, arrin në 40 mld lekë.

LEXONI GJITHASHTU:

• Pagat u rritën 9000 lekë për një vit, shteti paguan më shumë se privati
• Sa rriten pagat e gjyqtarëve të Kushtetueses, më të lartat në piramidën e shtetit