Rreth 100 familje që jetojnë në banesë sociale nga ky muaj do të paguajnë më shumë qira për bashkinë. Kostot e qerasë janë rritur nga 7 deri 1600 lekë në muaj, shifër që për banorët nuk përballohet me të ardhurat që kanë.
Bashkia e Korçës ka rritur qiratë për 98 familje të cilat jetojnë në banesa sociale. Pjesa më e madhe e banorëve që jetojnë në këto banesa thonë se nuk mund të përballojnë një kosto të re financiare.
“Ne na i dhanë me qira, e pranuam aq sa na i dhanë. Tani po e ngrejnë, ne jemi pensionetet, me kempe që nuk e paguajmë dot çmimin. Ku do shkoje puna jonë? Gasnoniere paguajnë 40, dhomë e guzhine 68, 2+1 98. Tani e kanë shtuar 8, 13 mijë dhe 17 mijë per 2+1. Nuk e përballojmë dot. Ne leket I kemi për ilaçe”, tha një burrë.
“Të gjithë që jemi atje jemi me kempe, pensione nuk kemi. Fëmijët pa punë. Në Bashki futen ata që kanë njerëzit, futin nipërit, ne i kemi fëmijët pa punë. Unë marr 170 me burrin, 90 pension, 80 Kemp. Si do bëj? Dhomë e kuzhinë kam. Paguaj 68. Shkon 77. Që në shkurt shkon 150”, tha një grua.
Disa prej tyre shprehen se nuk do të paguajnë rritjen e qerasë pasi të ardhurat e tyre janë të siguruara nga përkrahja sociale, invaliditetiti si dhe pensionet minimale duke e bërë të pamundur përballimin e kësaj rritje.
“Ne nuk paguajnë as uje, as drita, as qera. Po të dojë policia, le të na heqë. Nuk kam ku I gjej. Nusja 150, unë marr 76. Ajo u ra të gjithëve në kokë. Të shumtët me kempe në bashkia”, tha një i intervistuar.
“Ne nuk do paguajmë. Ku do shkojmë ne? Këto shtëpi janë në nevojë të njerëzve. Nuk e di çdo bëhet, asgjë nuk do bëhet. Ne nuk dalim, presim privatizimin”, tha një burrë.
Drejtues në Bashkinë e Korçës thonë se kjo rritje ka ardhur për shkak të indeksimit të çmimeve të qirave duke u bazuar në të dhënat e INSTAT. Rritja e qirave, sipas drejtoreshës së strehimit social bazohet në kontratat një vjeçare që ky institucion ka me familjet në nevojë.
“Është bërë indeksimi i qerasë bazuar në idenksine rritjes së çmimeve që e marrin nga INSTAT. I referohet viteve 2018-2023, reflektohet në qera e vitit 2024. I kaluam këshillit bashkiak me arsyet objektive pse nuk është rritur qeraja në këto vite, pandemia, nuk mund të toleronim detyrim ligjor. Banorët janë të njohur me rritjen e qerasë sepse ndodhet në nenin 3 në kontratë, ku thuhet se niveli i qerasë ndryshon me rritjen e çmimeve që miratohet nga këshilli bashkiak”, tha Mirela Balli, drejtoreshë e strehimit sociale në Bashkinë Korçë.
Vlerat e qerasë mujore të banesave sociale u rritën për 700 lekë të reja për garsoniere, 1300 lek për apartamente 1+1 dhe 1600 lekë për apartamente 2+1.
LEXONI GJITHASHTU:
- Sa pritet të taksohen banesat me qira ditore, çfarë parashikon ligji
- Berisha: Qiratë, çmimet dhe tarifat po e bëjnë universitetin një mollë të ndaluar
