Rriten rastet me viroza në Peqin, më të prekur fëmijët dhe të moshuarit

Fluksi i pacientëve në urgjencën e Peqinit është rritur ndjeshëm këto ditë, si pasojë e virozave sezonale që po qarkullojnë gjerësisht. Më të prekurit janë fëmijët dhe të moshuarit me sëmundje kronike. Sipas të dhënave nga shërbimi i urgjencës, çdo javë paraqiten mesatarisht rreth 80 pacientë, që do të thotë rreth 350 raste në muaj me simptoma si temperaturë, të vjella dhe gastroenterite.

Kryeinfermierja e urgjencës Peqin, Shkëndi Ballhysa theksoi se simptomat më të rënda janë tek moshat që janë me sëmundje kronike.

“Mesatarja i bie 80 pacientë që paraqiten gjatë gjithë javës në urgjencë. Simptomat kryesore janë temperatura, gastrohenteritet, të vjella. Ka raste që vjen edhe me tension, hipertension. Rastet e rënda që s’janë për ne i trajtojmë në Spitalin Rajonal të Elbasanit.

Simptomat më të rënda janë tek moshat që janë me sëmundje kronike, që janë moshat e treta, dhe me temperatura të larta vijnë fëmijët e vegjël që i rëndon pak më shumë”, tha ajo.

Ballhysa apelon për kujdes të shtuar, veçanërisht tek prindërit me fëmijë të vegjël, për të parandaluar përhapjen e infeksioneve virale.

“Pirja e lëngjeve, shmangia e ambienteve të mbyllura për të mos e marrë virozën. Dhe me ndenjë në shtëpi ai që është me virozë, mos me e çu fëmijën në çerdhe, kopësht apo shkollë, që të parandalojë virozën dhe të mos e rëndojë fëmijën”, tha ajo.

Specialistët e shëndetësisë kërkojnë kujdes të shtuar në këto ditë me ndryshime të shpeshta temperaturash, duke theksuar se trajtimi në kohë dhe parandalimi janë mënyra më e mirë për të shmangur komplikacionet.

LEXONI GJITHASHTU:

• “Ankth dhe pasiguri në Serbi”, Ben Andoni ndan detaje çfarë pa nga protestat
• Kurti vizitë në fabrikën e prodhimit të dronëve