Rritja e pagave të Kushtetueses, pse “dështoi” votimi në parlament

Për herë të dytë brenda dy javëve, votimi në parlament i pagave të gjyqtarëve të Gjykatës Kushtetuese është shtyrë.

Domosdoshmëria për të votuar këtë ndryshim me 84 vota, të cilat nuk i disponon ka bërë që shumica socialiste të bëj një hap pas dhe të pranojë kërkesën e Partisë Demokratike për të mos e kaluar në seancën e 21 shtatorit.

“Qeveria shqiptare të ndërmarrë një reformë tërësore në pagat e gjyqësorit, duhet patjetër që të shoh edhe gjykatën speciale e cila ka një volum të rritur pune, duhet patjetër që të shoh edhe hierarkinë e pagave në të gjithë sistemin e drejtësisë. Të tërhiqet ligji për gjykatën kushtetuese sot, t’i ushtrojmë ato procedurës parlamentare, ta diskutojmë si pjesë e diskutimeve të reformës në drejtësi dhe të shikojmë mundësinë për të bërë një reformë tërësore”, deklaroi gjatë seancës deputetja e Partisë Demokratike Jorida Tabaku.

Ndërkohë deputeti i Partisë Socialiste, Toni Gogu, u shpreh gjatë seancës: “Ne jemi plotësisht dakord që ta shtyjmë dhe gjithashtu uroj që të reflektojnë edhe kolegët për mos të hedhur më baltë mbi institucionet kushtetuese të këtij vendi që ruajnë kushtetutshmërinë.”

Më herët për këtë çështje kryetar i Partisë Demokratike, Lulzim Basha ka deklaruar votën pro ndërsa deputetët në këtë parti që mbështetesin Sali Berishën janë shprehur kundër.

Në bazë të ndryshimeve të propozuara, një gjyqtar i Gjykatës Kushtetuese do të marrë nga 408 000 Lekë – pagën 644 640 lekë.

LEXONI GJITHASHTU:

• Pagat e gjyqtarëve kushtetues, opozita e ndarë; Basha pro, Berisha e Bardhi kundër
• Zgjedhja e Avokatit të Popullit, Bardhi kërkesë Kryetares së Kuvendit