Rritja e tensioneve tregtare, Banka Qendore Evropiane ul normat e interesit

Banka Qendrore Evropiane shkurtoi të enjten normat e interesit për depozitat me 25 pikë, duke i çuar në 2 për qind, që është dhe kuota më e ulët prej më shumë se dy vjetësh.

Normat sa i takon operacioneve të rifinancimit dhe lehtësimit të huadhënies do të ulen gjithashtu në 2.15 dhe 2.40 për qind, një lëvizje kjo që do të hyjë në fuqi më 11 qershor.

Norma e interesit për operacionet e rifinancimit është kuota që bankat paguajnë kur marrin hua nga BQE për një javë, ndërsa lehtësimi i huadhënies është për rastet kur huamarrja bëhet brenda një dite.

Normat për depozitat janë ndërkohë kuotat që bankat marrin kur depozitojnë para brenda ditës në Bankën Qendrore Evropiane.

“Ndërsa pasiguria që rrethon politikat tregtare pritet të rëndojë tek investimet dhe eksportet, sidomos në një periudhë afatshkurtër, rritja e investimeve qeveritare për mbrojtjen dhe infrastrukturën do të mbështesë rritjen në një periudhë afatmesme”, deklaroi BQE.

Sipas institutit financiar, të ardhura më të larta dhe një treg më i fortë pune do t’u mundësojë konsumatorëve të shpenzojnë më shumë.

“Shoqëruar me kushte më të favorshme financimi, kjo do ta bëjë ekonominë më fleksibël ndaj tronditjeve globale”, vijon njoftimi.

Shkurtimet e së enjtes mbështeten nga lehtësimi i presionit të çmimeve. Sipas parashikimeve të BQE-së, inflacioni bazë do të arrijë mesatarisht në 2 për qind në 2025-n, 1.6 në 2026-n dhe 2 në 2027-n.

LEXONI GJITHASHTU:

• BQE do të rrisë normat e interesit për të ulur inflacionin 
• BQE rrit normat e interesit, Lagarde: Perspektiva e inflacionit, e lartë dhe e gjatë