“Rrjeti”, arrestohet 36-vjeçari në Elbasan, pjesë e grupit që shpërndante drogë

Arrestohet një 36-vjeçar i shpallur në kërkim në kuadër të operacionit “Rrjeti”.

Shkon në 51 numri i shtetasve të vënë në pranga për këtë operacion për goditjen e një rrjeti që ushtronte veprimtaritë kriminale të prodhimit, shpërndarjes dhe trafikimit të lëndëve narkotike në qarkun e Elbasanit.

“Si rezultat, në lagjen “5 Maji”, u bë kapja dhe ndalimi i shtetasit H. K., 36 vjeç, për të cilin Gjykata e Elbasanit ka caktuar masën e sigurisë “Arrest në burg”, për veprën penale “Prodhimi dhe shitja e narkotikëve”- njofton policia.

Operacioni policor i koduar “Rrjeti”, i finalizuar më datë 29.06.2023, u shtri në Elbasan, Cërrrik, Peqin, Belsh, Librazhd, Përrenjas dhe Pogradec.

Gjatë këtij operacioni u angazhuan 490 punonjës policie dhe 5 dronë, si dhe u kontrolluan 52 banesa dhe 18 lokale.

Gjatë kontrolleve, Policia gjeti dhe sekuestroi në cilësinë e provës materiale: 1 kilogram e 311 gramë kokainë, 860 gramë heroinë, 1 kilogram e 317 gramë kanabis, mijëra doza kokaine, heroine, kanabisi dhe metadoni, fara kanabisi, një armë zjarri model 56, sasi municoni luftarak, pjesë të armëve të zjarrit, silenciatorë, armë të ftohta, një shumë të madhe parash prej 51 milionë lekësh, 15 mijë euro, si dhe një shumë frangash zviceriane.

Vijon puna për kapjen e 6 shtetasve të tjerë të shpallur në kërkim.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.

Për të ndjekur kanalin e youtube të Euronews Albania KLIKO KËTU! 

LEXONI GJITHASHTU: 

• U shkatërruan 3900 prona dhe makina, dëmet nga protestat në Francë 650 mln euro
• Nis seanca për 45 të arrestuarit në Elbasan, prokuroria kërkon burg për 37 persona