Policia dhe forcat speciale RENEA kanë “blinduar” Shkodrën, pas plagosjes së dy personave gjatë mbrëmjes së sotme, për të bërë të mundur identifikimin dhe arrestimin a autorëve.

Po ashtu, në Shkodër ka shkuar edhe drejtori i Përgjithshëm i Policisë së Shtetit, Muhamed Rrumbullaku, për të inkurajuar forcat e Policisë.

Përmes një njoftimi, Policia bën të ditur se shënjestër e sulmit ka qenë 30-vjeçari Gjergj Ndërshtiqa, por si pasojë e të shtënave është plagosur edhe kunati i tij, 28-vjeçari Gjon Nika, student i Akademisë së Sigurisë.

Po ashtu, shërbimet e Policisë, gjatë kontrollit të zonës, për kapjen e autorëve, në afërsi të vendit të ngjarjes, kanë konstatuar duke u djegur një automjet tip “Renault”, i cili dyshohet se është përdorur nga autorët.

Njoftimi i Policisë:

Rreth orës 19:30, në afërsi të një lokali në fshatin Grudë e Re, është qëlluar me armë zjarri shtetasi Gjon Nika, rreth 30 vjeç. Si pasojë e të shtënave është plagosur edhe kunati i tij, shtetasi Gjergj Ndërshtiqa, 28 vjeç, student në Akademinë e Sigurisë. Të dy këta shtetas janë transportuar në spital, për ndihmë mjekësore.

Në drejtim të vendit të ngjarjes janë nisur shërbimet e Policisë, drejtuesit e Drejtorisë Vendore të Policisë dhe të Komisariatit të Policisë Shkodër.

Në ndihmë të Policisë vendore janë nisur disa grupe të Forcës Kombëtare të Sigurisë dhe të RENEA-s, si dhe specialistë nga Departamenti i Policisë Kriminale në Policinë e Shtetit.

Shërbimet e Policisë, gjatë kontrollit të zonës, për kapjen e autorëve, në afërsi të vendit të ngjarjes, kanë konstatuar duke u djegur një automjet tip “Renault”, i cili dyshohet se është përdorur nga autorët.

Grupi hetimor, në drejtimin e Prokurorisë, po punon për zbardhjen e plotë të rrethanave të ngjarjes dhe identifikimin e autorit.

Pas sqarimit të rrethanave të ngjarjes dhe në përfundim të veprimeve të para, do të ketë informacion më të detajuar për këtë rast.

LEXONI GJITHASHTU:

• Foto| Ky është studenti i Akademisë së Policisë që u plagos sot në Shkodër
• EMRI| Të shtëna me armë zjarri në Shkodër, një efektiv policie i plagosur