Rubio: Takimi Trump-Putin varet nga përparimi në dhënien fund të luftës

Një takim eventual mes presidentit amerikan, Donald Trump dhe presidentit rus, Vladimir Putin, do të varet prej progresit që bëhet drejt përfundimit të luftës në Ukrainë, ka thënë Sekretari amerikan i Shtetit, Marco Rubio.

Rubio ka thënë në një intervistë se ia ka bërë të ditur ministrit të Jashtëm rus, Sergei Lavrov, në takimin e tyre në Arabinë Saudite më 18 shkurt, se nuk do të ketë takim “derisa të dimë qartë se për çfarë do të mbahet ai”.

Takime të tilla nuk mbahen derisa “të dihet ndonjë rezultat, apo të dihet se është arritur përparim”, ka shtuar Rubio.

Në bisedimet në Riad, Shtetet e Bashkuara dhe Rusia janë pajtuar për të krijuar ekipe negociatore për t’i hapur rrugë përfundimit të luftës, që është nisur nga Rusia, në shkurt të vitit 2022.

Si, Trump, ashtu edhe Putin, kanë thënë se do të dëshironin të mbanin një samit.

“Prandaj e them se mbajtja e takimit do të varet nga arritja e ndonjë përparimi për dhënie fund të luftës në Ukrainë, dhe nëse arrijmë që ai takim të vulosë marrëveshjen, secili duhet të përgëzojë presidentin Trump për aftësinë e negocimit të paqes”, ka thënë ai.

Rubio i ka bërë këto deklarata teksa ka folur me gazetaren amerikane, Catherine Herridge në platformën X – dikur Twitter.

Trump është duke bërë përpjekje që t’i japë fund luftës, ndonëse taktikat e tij kanë alarmuar qeveritë evropiane dhe atë ukrainase, meqë ato shqetësohen se Rusia dhe SHBA-ja mund të pajtohen për një marrëveshje që anashkalon interesat e tyre të sigurisë.

Më 19 shkurt, Trump e ka tronditur Ukrainën dhe aleatët evropianë kur e ka quajtur presidentin, Volodymyr Zelensky një “diktator” dhe e ka fajësuar gabimisht Ukrainën për nisjen e luftës.

LEXONI GJITHASHTU:

• Sekretari amerikan i Shtetit Rubio takim me Netanjahun: Hamasi duhet të “shfaroset”
• Të dhënat amerikane nuk mbështesin pretendimet e Trump mbi shpenzimet për Ukrainën