Rusia dhe SHBA diskutuan në Stamboll rivendosjen e fluturimeve direkte

Janë zbardhur detaje të reja nga bisedimet mes diplomatëve të Rusisë dhe Shteteve të Bashkuara që u zhvilluan për rreth gjashtë orë të premten në Stamboll.

Ministria e Jashtme e Rusisë deklaroi se një nga çështjet e diskutuara ishte rivendosja e lidhjeve të drejtpërdrejta ajrore mes dy vendeve, por nuk dha detaje mbi përgjigjen e palës amerikane. Megjithatë, lajmi pati një ndikim të menjëhershëm ekonomik, pasi aksionet e linjës ajrore ruse Aeroflot u rritën me 3.8% pas publikimit të deklaratës.

Lidhjet ajrore mes Rusisë dhe shumë vendeve perëndimore u ndërprenë në vitin 2022 si pjesë e sanksioneve ndaj Moskës për shkak të luftës në Ukrainë. Nëse SHBA dhe Rusia arrijnë një marrëveshje për rifillimin e fluturimeve direkte, kjo do të ishte një nga rezultatet më të prekshme ekonomikisht të afrimit të mundshëm mes dy vendeve.

Në bisedimet e Stambollit, palët diskutuan gjithashtu për kapërcimin e mosmarëveshjeve në marrëdhëniet dypalëshe, të trashëguar nga administrata e mëparshme amerikane.

Një tjetër temë e ngritur nga Rusia ishte kthimi i gjashtë pronave të ambasadës ruse në SHBA, të konfiskuara mes viteve 2016 dhe 2018.

“U theksua veçanërisht nevoja për rezultate praktike që synojnë krijimin e kushteve për përmirësimin e marrëdhënieve dypalëshe në interes të popujve të vendeve tona”, thuhet në deklaratën e Ministrisë së Jashtme të Rusisë.