Rusia kryen sulme vdekjeprurëse në Kharkiv

Sulmet me dronë të Rusisë që goditën ndërtesa banimi në Kharkiv, në verilindje të Ukrainës, kanë vrarë të paktën tre persona dhe kanë plagosur 32 të tjerë, thanë zyrtarët lokalë.

Sulmet me dronë, të kryera më 3 prill, shkaktuan zjarre tha guvernatori rajonal, Oleh Synyehubov, i cili shtoi se dy fëmijë ishin në mesin e të plagosurve. Sipas tij, disa blloqe banimi shumëkatëshe u shënjestruan. Ekipet e shpëtimit ende janë duke kërkuar për të mbijetuar që mund të jenë bllokuar në rrënojat e ndërtesave, thanë autoritetet.

Kryetari i Kharkiv, Ihor Terekhov, tha se forcat ruse kryen të paktën 14 sulme në Harkiv brenda 40 minutave. Po ashtu autoritetet raportuan për një të plagosur nga sulmet me dronë në fshatin Ruski Tishki, në periferi të Kharkiv, vendbanim që javët e fundit është goditur vazhdimisht nga dronët rusë.

Në Dnipro, ndërkaq, tre persona u plagosën pas një sulmi masiv me dronë, tha guvernatori rajonal. Po ashtu, të paktën shtatë sulme me dronë janë kryer në rajonin e Zaporizhjas. Në Rusi, kryetari i Moskës, Sergei Sobyanin, tha mëngjesin e 4 prillit se njësitë kundërajrore ruse kanë zmbrapsur një dron që ishte nisur drejt kryeqytetit rus.

“Specialistët e emergjencës po punojnë në vendet ku ranë fragmentet e dronit”, shkroi ai në Telegram.

Agjencitë ruse të lajmeve më vonë cituan përfaqësues të agjencisë federale të transportit që thanë se aeroporti Vnukovo, në Moskë, është rihapur për fluturime. Mediat ruse thanë se edhe dy aeroporte të tjera ishin urdhëruar që të mbylleshin, por ende nuk është e qartë nëse në këto dy aeroporte kanë rinisur fluturimet.

LEXONI GJITHASHTU:

• Rrezik për ekonominë globale nga tarifat e Trump, tregjet aziatike në rënie
• Izraeli nis operacionin tokësor në veri të Rripit të Gazës