Rutte dhe Frederiksen: Arktiku kërkon prani më të madhe të NATO-s

Shefi i NATO-s, Mark Rutte, dhe kryeministrja daneze, Mette Frederiksen, pranuan të premten se Aleanca duhet të përforcojë sigurinë në rajonin e Arktikut, pasi presidenti Donald Trump u tërhoq nga kërcënimi për aneksimin e Grenlandës me anë të forcës.

“Ne po bashkëpunojmë për t’u siguruar që e gjithë Aleanca të jetë e sigurt dhe, përmes këtij bashkëpunimi, do të avancojmë mbrojtjen në Arktik”, shkroi Rutte në një postim në rrjetin “X”, pas një takimi me Frederiksen në Bruksel.

Nga ana e saj, shefja e qeverisë daneze tha se është dakord që NATO të rrisë praninë dhe angazhimin në Arktik. “Mbrojtja dhe siguria e këtij rajoni janë çështje që i përkasin gjithë Aleancës”, tha ajo.

Takimi erdhi pasi presidenti amerikan Donald Trump deklaroi të mërkurën se, bashkë me sekretarin Rutte, kishin rënë dakord mbi një kornizë bashkëpunimi për Grenlandën, e cila plotësonte kërkesat e tij.

Trump tërhoqi kërcënimet për të aneksuar ishullin autonom dhe për të vendosur tarifa ndaj aleatëve që do të pengonin ambiciet e tij për marrjen nën kontroll të territorit autonom.

Sidoqoftë, detajet e marrëveshjes mes Rutte dhe Trump nuk janë bërë publike, por zyrtarët e BE-së thonë se avancimi i sigurisë në Arktik ishte pjesë e planit.

Edhe Frederiksen tha një ditë më parë se aleatët kishin rënë dakord për nevojën e një pranie të përhershme ushtarake në Arktik, përreth Grenlandës.

Vendet anëtare të NATO-s kanë rënë dakord për përforcimin e sigurisë në Arktik, pasi Trump tërhoqi kërcënimet për aneksimin e Grenlandës. Propozimi për këtë qëllim është bërë prej kohësh, por komandantët ushtarakë të Aleancës deklarojnë se planifikimi konkret duhet ende të fillojë.