Sa deputetët marrin shqiptarët në Maqedoni të Veriut? E zbulon eksperti

Opozita maqedonase në Maqedoninë e Veriut shpalli fitoren absolute me kandidatin e saj për president të shtetit në raundin e parë të zgjedhjeve presidenciale.

VMRO DPMNE me Gordana Siljanovskën, korrën dyfish më shumë vota se sa kandidati i partisë maqedonase në pushtet LSDM. Në kampin shqiptar fitoren e festoi partia shqiptare në pushtet BDI me kandidatin e saj Bujar Osmani i cili mori afro 40 mijë vota më shumë se kandidati i opozitës shqiptare Arben Taravari.

Besim Nebiu analist nga RMV tha në një intervistë për Euronews Albania se nisur nga numri i votave të mbledhura në raundin e parë të zgjedhjeve presidenciale, VMRO i duhen minimalisht edhe 8 deputetë për të arritur shumicën për të krijuar qeverinë.

“Koalicioni i BDI, Fronti Evropian do merrte 17 deputetë, ndërsa koalicioni opozitar 12 deputetë. Janë kombinacione të dyja të mundshme, koalicioni VLEN është i përbërë ekskluzivisht nga parti shqiptare, ndërsa fronti ka 4 ose 5 parti joshqiptare, është multientik. VMRO e bëri fushatën mbi bazën e premtimit se nuk do bënte koalicion me BDI, që e cilëson si parti të korruptuar”, tha analisti.