Samiti i Diasporës, Hasani: Kurrë nuk kanë gëzuar shqiptarët një emër kaq të mirë

Ministri për Evropën dhe Punët e Jashtme, vlerësoi arritjet e Shqipërisë në arenën ndërkombëtare gjatë ditës së dytë të takimit të Samitit të Diasporës të mbajtur në Tiranë.

Hasani theksoi në fjalën e tij se ky samit mbahet në një kohë kur shqiptarët më shumë se kurrë kanë arsye të ndihen mirë me arritjet e tyre.

Ai theksoi se nga Shqipëria në Kosovë, nga Maqedonia e Veriut në Malin e Zi, nga politika e diplomacia e deri te arti e sporti, kurrë më parë nuk kanë gëzuar shqiptarët një emër e reputacion më të mirë.

“Është vërtet një kënaqësi t’ju mirëpresim në Tiranë, kaq të shumtë, nga çdo anë e kënd i botës.

Nuk ka mesazh më të qartë e më të bukur bashkimi sesa kjo sallë e mbushur plot.

Sesa kjo mbledhje e madhe e shqiptarëve nga mbarë hapësira shqiptare në rajon – Shqipëria, Kosova, Maqedonia e Veriut, Mali i Zi, Presheva – por edhe nga mbarë bota.

Ky Samit vjen në një moment kur ne shqiptarët më shumë se kurrë kanë arsye të ndihen mirë me atë çka kanë arritur.

Nga Shqipëria në Kosovë, nga Maqedonia e Veriut në Malin e Zi, nga politika e diplomacia e deri te arti e sporti, kurrë më parë nuk kanë gëzuar shqiptarët një emër e reputacion më të mirë se sot.

Por ky është po ashtu një moment sfidash të paprecedent. Ne sot jetojmë në një botë shumë më të pasigurt sesa një dekadë më parë. Rajoni ynë përballet sot me më shumë pasiguri sesa në çdo moment tjetër në 2 dekadat e fundit.

Në këtë kontekst pasigurie globale, ne shqiptarët kemi ditur të konsolidojmë rolin tonë si garantë të orientimit euro-atlantik të rajonit. Kemi ditur po ashtu të promovojmë në sytë e të gjithë botës një model bashkëjetese e dialogu, mikpritje e tolerance që ka bërë që shqiptarët të fitojnë respektin e admirimin e aleatëve, miqve e partnerëve.

Por patjetër kemi ende shumë për të bërë. Kemi ende shumë për të bërë së bashku për t’i zhvilluar më tej vendet tona, për të konsoliduar përpara ato që kemi arritur.

Dhe nuk duhet të harrojmë: ajo që mund të bëjë Shqipëria e vetme, Kosova e vetme, vëllezërit e motrat tonë në Maqedoninë e Veriut apo në Malin e Zi të vetëm, është fare pak, krahasuar me ato që mund të arrijmë të gjithë së bashku”, tha Hasani.

LEXONI GJITHASHTU:

• Kurti anulon pjesëmarrjen në Samitin e Diasporës, ia delegon Osmanit
• Rama në Samitin e Diasporës: Po punojmë për binjakëzim me komunat arbëreshe