Sanksione të reja Rusisë, liderët e G7-s synojnë bllokimin e arit rus

Liderët e grupimit G7 ranë dakord të enjten të bllokojnë kapacitetet e Rusisë për të shitur rezervat e arit për të mbështetur valutën e saj, ndërsa u bashkuan në një nismë të re për të penguar përpjekjet e Moskës për t’iu shmangur sanksioneve perëndimore.

Lëvizja u publikua të enjten, kur liderët e vendeve anëtare u takuan në selinë e NATO-s në Bruksel, për të përforcuar ndëshkimin ekonomik ndaj regjimit të presidentit Putin, për pushtimin e Ukrainës.

Ajo vjen në një kohë kur administrata Biden dhe qeveritë evropiane janë fokusuar në forcimin e sanksioneve të vendosura në nisjen e konfliktit dhe në mundësinë për zbatimin e masave shtesë kundër Moskës.

“Krerët e vendeve të G7-s do të vazhdojnë të punojnë së bashku për të gjymtuar aftësinë e Rusisë për të lëvizur rezervat e saj që synojnë forcimin e ekonomisë ruse dhe financimin e luftës së Putin, përfshirë këtu sanksionimin e çdo transaksioni të Bankës Qendrore të Federatës ruse”, bëri të ditur Shtëpia e Bardhë në një deklaratë për shtyp.

LEXONI GJITHASHTU:

• Rihapet bursa ruse, rriten aksionet e kompanive të gazit dhe naftës
• Putin i kërkon Gazpromit që gazi rus të shitet në rubla