Sekuestrohen 11 kg kanabis e 534 bimë narkotike në Vlorë, 6 në pranga, 2 në kërkim

Një megaoperacion anti-drogë është zhvilluar së fundmi në Vlorë, ku në pranga kanë rënë 6 persona e janë shpallur në kërkim dy të tjerë.

Policia bën me dije se në kuadër të operacionit policor antidrogë i koduar “Indoors”, në fshatin Kropishtë, u arrestuan shtetasit Dritan Koçiraj, Niko Dhima, Florjan Çaushaj dhe u bë shpallja në kërkim e shtetasit Përparim Koçiraj, ndërsa në në lagjen “10 Korriku”, u arrestuan në flagrancë shtetasit Ledjon Zahaj, Edmond Begaj dhe Gentjan Metushi si dhe u bë shpallja në kërkim e shtetasit Lorenc Xhaferri.

Si rezultat i operacionit u sekuestruan 11 kilogramë kanabis në formë boçeje, 534 bimë narkotike, 156 llamba, 123 reflektorë, 11 ventilatorë, 4 aspiratorë, 7 kondicionerë dhe sende të tjera që i shërbenin kësaj veprimtarie kriminale.

Ndërkohë është bllokuar vila me ambiente të përshtatura për kultivimin e bimëve narkotike, me llamba.

Si u realizua operacioni, detajet

Në momentin që shërbimet operacionale kanë shkuar pranë vilës së shtetetasit Lorenc Xhaferri agjentët operacionalë kanë konstatuar se në këtë vilë nuk kishte persona brenda. Për këtë arsye, nisur nga dyshimet se brenda kësaj vile kultivoheshin bimë narkotike, me anë të llambave, ky ambient është mbajtur në vëzhgim dhe nuk është ndërhyrë për momentin.

Operacioni ka vijuar në fshatin Kropishtë, ku gjatë kontrollit në një ambient në pronësi të shtetasit Dritan Koçiraj, u gjetën dhe u sekuestruan 87 llamba, 12 transformatorë të vegjël elektrikë, 6 ventilatorë elektrikë, 4 kondicionerë dhe materiale bimore të dyshuara narkotike cannabis sativa.

Në vijim të veprimeve u bë arrestimi në flagrancë i tij, dhe u shpall në kërkim vëllai i tij, shtetasi Përparim Koçiraj, 55 vjeç.

Po në vijim të veprimeve u bë ndalimi i shtetasve Niko Dhima, 39 vjeç, me detyrë faturist i OSHEE Vlorë dhe Florjan Çaushaj, 34 vjeç, me detyrë përgjegjës grupi i elektricistëve të OSHEE Vlorë.

Ndërkohë, rreth orës 16:00, agjentët operacionalë që mbanin nën vëzhgim vilën në pronësi të shtetasit Xhaferri, kanë konstatuar një shtetas që ka hyrë me vrap në vilë, i cili po ndiqej nga punonjësit e Komisariatit të Policisë Vlorë dhe të “Shqiponjave”, pasi dyshohej se kishte tentuar të vriste një shtetas, me armë zjarri, në lagjen “10 Korriku”, Vlorë.

Në këto kushte është ndërhyrë nga të gjitha shërbimet operacionale dhe ato të rendit, në vilën e shtetasit e tij ku është bërë kapja në oborrin e kësaj vile dhe arrestimi në flagrancë i shtetasit që hyri me vrap në vilë, konkretisht shtetasit Ledjon Zahaj, 38 vjeç, autor i tentativës së vrasjes me armë zjarri të shtetasit Dëfrim Pashaj.

Shërbimet operacionale, bazuar në planin operacional dhe informacionet e siguruara, kanë hapur me forcë vilën e shtetasit Lorenc Xhaferri, ku kanë konstatuar se kati i parë dhe kati i tretë i saj ishin përshtatur për kultivim të bimëve narkotike.

Në vilën në pronësi të Lorenc Xhaferrajt, u gjetën dhe sekuestruan 534 bimë narkotike të kultivuara në vazo, 11 kilogramë lëndë narkotike në formë boçeje, 5 ventilatorë, 4 aspiratorë, 3 kondicionerë, 100 reflektorë, 23 impiante ngrohëse, 69 llamba, 6 filtra ajri, 1 armë gjahu, 3 aparate celulare, 1 automjet dhe sende të tjera të që shërbenin për kultivimin e bimëve narkotike me anë të llambave.

LEXONI GJITHASHTU: 

• Aleanca për Shqiptarët bëhet pjesë e Qeverisë së Maqedonisë së Veriut
• Qytetari pas tërmetit në Turqi: Kemi frikë, po u shemb ndërtesa s’ke ku të shkosh