Sekuestrohen armë, municon luftarak e kokainë në Korçë, 2 të arrestuar (EMRAT)

Minella Pleqi dhe Gjergji Renja janë arrestuar ditën e sotme në Korçë pasi janë kapur duke shpërndarë kokainë, ndërkohë që posedonin dhe armë zjarri e municion luftarak në banesën e tyre.

Policia bën me dije se dy të rinjtë u arrestuan pas një hetimi 5 mujor në kuadër të operacionit policor të koduar “Night sales”.

Shërbimet e Policisë kanë lokalizuar shtetasit e mësipërm në lagjen nr. 10, Korçë, ku gjatë kontrollit fizik të Pleqi dhe gjatë kontrollit të ushtruar në automjetin tip “Rang Rover”, në përdorim të shtetasit Renja, u gjetën disa doza me lëndë narkotike të dyshuar kanabis.

“Në vijim të veprimeve të mëtejshme procedurale gjatë kontrollit të ushtruar në banesën e marrë me qira nga këta dy shtetas, policia gjeti e sekuestroi në cilësinë e provës materiale 1 armë zjarri tip pistoletë; 2 krehra të armës së zjarrit; një sasi municioni luftarak; fidanë të kultivuar në gota plastike; 2 llamba neon led; 363.8 gramë lëndë e dyshuar narkotike kokainë; një sasi kanabisi e ndarë në doza, 1 peshore elektronike me mbetje të lëndës narkotike kokainë dhe një sasi lekësh që dyshohet se ishte siguruar nga kjo veprimtari”- njofton policia.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.

LEXONI GJITHASHTU: 

• Të shtëna me armë zjarri në një shkollë në Bosnjë, disa të plagosur
• Eksperti i sigurisë zbulon prapaskenat: Kurti nuk i hapi telefonin Ramës