Sekuestrohet prona me vlerë 200 mijë euro, u përfitua me kontratë të falsifikuar

Mbi një pasuri me vlerë rreth 200 000 euro në Pogradec, është vendosur një sekuestro preventive, pasi dyshohet se rrjedh nga veprimtaria kriminale e falsifikimit të dokumenteve, e kryer nga 2 shtetas, A. L., 47 vjeç dhe B. A., 46 vjeç.

Këta 2 shtetas janë në hetim, për veprat penale “Falsifikimi i dokumenteve” dhe “Pastrimi i produkteve të veprës penale ose veprimtarisë kriminale”, kryer në bashkëpunim, pasi dyshohet se nëpërmjet një kontrate të falsifikuar, kanë përfituar banesën e një shtetasi tjetër.

Hetimi për rastin ka filluar në vitin 2018. Të dy shtetasit nën hetim, mësohet se i kanë  dhënë para me fajde një qytetari nga Pogradeci.

Kur ky i fundit ishte në pamundësi për të shlyer shumën e marrë me fajde, dy personat e vënë nën hetim, në bashkëpunim me njëri-tjetrin kanë falsifikuar një kontratë, e cila kalonte pronesinë e shtëpisë së borxhliut në emër të tyre.

Nga dokumentat e falsifikuara, si firmat e familjarëve, personat kishin arritur që me vendim gjykate të parë dhe apelit, të fitonin pronësinë e banesës dhe para 5 vitesh arritën që t’i nxjerrin me përmbarues familjarët nga banesa.

Euronews Albania ka siguruar videon, ku shihet pamjet sesi familjarët janë nxjerrë nga banesa në vitin 2017, nga përmbaruesit.

LEXONI GJITHASHTU

• Sekuestrohen sasi të mëdha kokaine, Europol godet rrjetin kriminal në disa shtete
• Shpërthim me lëndë plasëse në një biznes në Durrës, disa të shoqëruar
• Humbën jetën 51 qytetarë, sot 3 vite nga tërmeti tragjik