Serbët largohen nga institucionet e Kosovës, Kurti: Beogradi po bëhet vegël e Rusisë

Kryeministri i Kosovës Albin Kurti ka reaguar pasi përfaqësuesit serbë në të gjitha institucionet e Republikës së Kosovës vendosën të largohen.

Në një postim që ka bërë në Facebook, Kurti ka thënë se presidenti serb Aleksandar Vuçiç koordinohet me ambasadorin rus në Beograd, duke e kthyer Serbinë në një vegël të Kremlinit.

Më tej ai tha se Beogradi nisi kërcënimet dhe përgatitjet për destabilizimin e Kosovës.

“Është e qartë se për çfarë bëhet fjalë: presidenti i Serbisë ka gënjyer dhe ka zhgënjyer amerikanët dhe evropianët; ai shumë shpesh takon dhe koordinohet me ambasadorin rus në Beograd. Serbia duke mos qenë vend demokratik po bëhet vegël e Kremlinit. Po ashtu, duket që ish zëdhënësi i partisë së Milosheviqit, tash ministër i jashtëm i Serbisë, është më i pushtetshëm sesa ish ministri i informatave të Milosheviqit, tash presidenti i Serbisë. Kjo është betejë personale e tyre për pushtet, as për qytetarët dhe as për shtet”- shprehet Kurti.

Ai u bëri ftesë të gjithë qytetarëve serbë në Kosovë, që ta ruajnë qetësinë, paqen dhe sigurinë. “Unë nuk jam kryeministër kundër juve, por Beogradi është kundër meje”, thotë Kurti.

“I ftoj të gjithë qytetarët serbë në Kosovë, që ta ruajnë qetësinë, paqen dhe sigurinë. Unë nuk jam kryeministër kundër juve, por Beogradi është kundër meje. Unë jam kryeministër që do t’ju shërbej duke respektuar kushtetutshmërinë dhe ligjshmërinë e Republikës së Kosovës. Prioritet imi janë luftimi i korrupsionit, pra drejtësia, dhe zhvillimi ekonomik, pra punësimi; barazi e mirëqenie për të gjithë, pa dallim etnie, feje apo prejardhje.

Mos i bojkotoni ose braktisni institucionet e Kosovës. Ato na shërbejnë të gjithë neve, çdonjërit prej jush. Mos bini pre e manipulimeve politike dhe lojërave gjeopolitike. Le t’i përmbahemi të gjithë bashkë vlerave demokratike dhe evropiane të sundimit të ligjit, të të drejtave dhe lirive të njeriut e të pakicave, pluralizmit politik.”- shkruan ndër të tjera Kurti.

LEXONI GJITHASHTU:

• ‘Stop fushatës së rreme mediatike’, protestë kundër propagandës në Hungari
• Kosova në prag të reformës më të madhe ligjore në kulturë