Serbia refuzon vizitën e ministrit të Brendshëm të Kosovës në Luginën e Preshevës

Ministri i Punëve të Brendshme të Kosovës, Xhelal Sveçla, ka bërë me dije se autoritetet serbe i kanë refuzuar vizitën e planifikuar në Luginën e Preshevës.

Përmes një postimi në rrjetin social facebook, Sveçla bën me dije se i ka paraqitur zyrës së ndërlidhjes në Serbi kërkesën me qëllimin e vizitës, por ajo është refuzuar pa asnjë shpjegim zyrtar nga Beogradi.

Sveçla nënvizon se ky akt i Serbisë dëshmon qasjen destruktive dhe shtypjen e vazhdueshme të ndaj shqiptarëve të Luginës.

Ai shton se për çështjen e vizitave të zyrtarëve shtetërorë, Kosova do të veprojë mbi parimet e reciprocitetit.

“Me datë 29 dhjetor kam pranuar ftesë nga z. Nevzad Lutfiu, Kryetar i Këshillit Kombëtar Shqiptar për vizitë në Preshevë, Medvegjë dhe Bujanoc. Sipas agjendës, ishin planifikuar takime në selitë e Këshillit në tri komuna si dhe me deputetin e vetëm shqiptar në Parlamentin e Serbisë Shaip Kamberi. Me kënaqësi kam pranuar ftesën dhe kam filluar përgatitjet.

Në respektim të marrëveshjes së Brukselit dhe praktikave të deritanishme, përmes Ministrisë së Punëve të Jashtme dhe Diasporës kemi përcjellur agjendën dhe informatat e nevojshme të delegacionit në zyren ndërlidhëse të Serbisë për leje të hyrjes në Serbi dhe realizim të vizitës.

Mbrëmë në orët e vona, nga zyrtari ynë ndërlidhës në Beograd jam njoftuar se kërkesa jonë për vizitën e sotme në Luginë është refuzuar nga autoritetet e Serbisë pa asnjë arsye spjegim.

Ky akt i Serbisë ndaj vizitës sime dëshmon qasjen destruktive dhe shtypjen e vazhdueshme të saj ndaj shqiptarëve të Luginës.

Ky refuzim pa asnjë arsyetim nga Serbia disa orë para realizimit të vizitës, nuk zbehë qëllimet dhe angazhimin tonë për shqiptarët e Luginës. Ndër të tjera, nuk do të zbehë as dëshirën dhe qëllimin tim për realizim të vizitës atje, për të ndarë me shqiptarët e Luginës shqetësimet e padrejtësitë me të cilat ata ballafaqohen dhe angazhimet e institucioneve të Republikës sonë për ta.

Për çështjen e vizitave të zyrtarëve shtetërorë, ne do të veprojmë mbi parimet e reciprocitetit si vlerë e barazisë mes dy shteteve tona”, shkruan Sveçla në facebook.

LEXONI GJITHASHTU:

• Borrell: Liberalizimi i vizave për Kosovën i sjell përfitime edhe BE-së
• Gjermania përshëndet liberalizimin e vizave për Kosovën: I afron njerëzit në Evropë