“Serbia zyrtarizoi dështimin e dialogut”, BE: Marrëveshje detyruese për të dyja palë

Bashkimi Evropian ka shprehur qëndrimin se Serbia është ligjërisht e detyruar te zbatojë Marrëveshjen e Brukselit dhe Aneksin e Ohrit, një ditë pasi kryeministrja serbe, Ana Bërnabiç, konfirmoi me shkrim se shteti i saj nuk e ka ndërmend që t’i zbatojë.

Këtë qëndrim Bërnabiç e shprehu në emër të Serbisë, si rezervë ndaj deklaratës së miratuar në Samitin e liderëve të BE-së dhe atyre të Ballkanit Perëndimor në Bruksel. Zëdhënësi i BE-së, Peter Stano, theksoi se natyra detyruese e dakordimit të marrëveshjeve ka qenë qëndrim konsistent i bllokut.

Në deklaratën e miratuar të mërkurën në Bruksel nga liderët e BE-së dhe Ballkanit Perëndimor u bëhet thirrje Kosovës dhe Serbisë që të zbatojnë pa kushte dhe në tërësi këtë marrëveshje.

Kosova dhe Serbia pasi pranuan propozimin franko-gjerman, në shkurt të këtij vitit ranë dakord për zbatimin e tij që mori formën e një marrëveshjeje mes tyre, të njohur më pas si Marrëveshja e Brukselit apo Marrëveshja për Rrugën drejt Normalizimit të Raporteve me Kosovën. Me ndërmjetësimin e BE-së, që të dyja palët u pajtuan për aneks-zbatimin e saj.

LEXONI GJITHASHTU:

• Serbia mban sot zgjedhjet e jashtëzakonshme parlamentare, lokale e krahinore
• Prag zgjedhjesh, Serbia voton të dielën, sondazhet: Partia e Vuçiç, 40% të votave