“Njeriu duhet të jetë shumë i fortë në vetvete të përballojë çdo gjë që i bie”. Kanceri i gjirit nuk e mposhti dot mësuese Dranen. Karakteri i saj i fortë, buzëqeshja që nuk i mungon asnjëherë ishin armët e saj për tu përballur me sëmundjen që i trokiti papritur 18 muaj më parë.

“Duke biseduar me një shoqe timen që e ka kaluar, më tregoi ca forma, ca gjëra dhe kam vu re pastaj në dush, që kishte ndryshuar forma e gjoksit”,-tha Drane Prenga.

Në prill të vitit 2023, ajo mësoi se kishte kancer gjiri, në stadin e dytë, por kjo nuk e bëri të humbas shpresën.

 “Ai moment për çdo njeri është i vështirë, është i vështirë por me ndihmën e zotit dhe të mjekut e kam përballuar në mënyrën më të mirë nga ana psikologjike, më kanë dhënë shumë kurajo dhe mjeku dhe vetë jam një njeri që nuk i përjetoj gjërat shumë siç i përjetojnë disa. Jam shumë e fortë në shpirt , i shikoj me pozitivitet dhe kjo më ka ndihmuar shumë dhe familjarët e mi më thonë sa mirë e ke përballuar me këtë lloj stresi”,-tha Drane Prenga.

Familja ishte dhe vazhdon të jetë forca e saj më e madhe, të cilën ajo shpesh u përpoq ta mbronte edhe nga dhimbja.

“ I fshihja emocionet. Familja e ka përjetuar shumë keq. Unë jam detyruar të fshihem nga brenda, të fsheh  emocionet që mos ju jap shkas atyre që të mërziten, si djalit si vajzës si burrit, sidomos burri e ka përjetuar tmerrsisht keq”,-shtoi ajo.

Ajo na rrëfen se nuk kishte frikë, por në mendjen e saj e mundonte pyetja, pse ajo?

“Kur kam shkuar përpara sallës jam step i çik, frikë s’kisha vetëm se jam step pak , duke menduar pse po më ndodh mua? Në një kohë që s’kisha abuzuar me asgjë, as duhan, as pije”.

Drania konsiderohet e shëruar, megjithatë asaj i kanë mbetur edhe 3 seanca kimioterapie, në të cilat e shoqëron bashkëshorti.

“ I them rri kur të marr në telefon që fillon terapia hajde. Jo thotë nuk rri dot. Kur shkojmë atje i them rri tek lulishtja , se është shumë emocional dhe i përjeton gjërat shumë keq”.

Ashtu si shumë gra, ajo thotë se nuk kishte bërë më parë një kontrroll të gjirit, ndaj edhe apelon që gratë dhe vajzat të mos e neglizhojnë këtë sëmundje, që po merr jete vetëm se kapet vonë.

“ Të gjitha vajzat dhe gratë pas moshës 20 vjec, se unë kam patur në spital 20 vjeç me këto gjëra, dhe të bëjnë ekzaminime të bëjnë mamografi dhe mos e lënë pas dore , sa më shpejt kapet problem aq më shpejt shërohesh”,-u shpreh Drane.

Statistikisht 1 në 8 gra në Shqipëri janë të rrezikuara nga kanceri i gjirit. Për të parandaluar dhe kapur në kohë sëmundjen është i nevojshëm vetëkontrolli, dhe kryerja e ekos së gjirit dhe mamografisë në mënyrë periodike për çdo grua.

LEXONI GJITHASHTU:

• “Mësova të jetoj me sëmundjen”, historia e 50-vjeçares që arriti të luftojë kancerin
• Maratona për “Tetorin Rozë” në Tiranë, të ardhurat shkojnë për kancerin e gjirit