SHBA për dinarin, Hovenier: Të ndryshojë mënyra e zbatimit të vendimit të bankës

Ambasadori amerikan në Prishtinë, Jeffrey Hovenier, ka kërkuar nga qeveria e Kosovës që të ndryshojë mënyrën e zbatimit të vendimit për çështjen e dinarit.

Në një prononcim për mediat pas takimit me zv/kryeministrin e Kosovës, Besnik Bislimi, diplomati amerikan tha se SHBA e respektojnë vendimin e Bankës Qendrore, por institucionet duhet të kuptojnë pasojat që ka ky vendim për serbët e Kosovës.

“Ne e respektojmë vendimin e BQK e cila ka për detyrë që të qeverisë me çështjet monetare të Kosovës. Jemi të shqetësuar për atë se kjo mund të ndikojë për popullatën e cenueshme, komunitetin serb të Kosovës. Është më rëndësi që të ndryshohet mënyra e zbatimit. Bisedimet tona për këtë çështje vazhdojnë. Ka mundësi që të dy palët të ofrojnë zgjidhje se si mund të arrihet kjo”, tha Hovenier.

Hovenier tha se Bislimi nuk i ka dhënë ndonjë propozim për zgjidhjen e çështjes së dinarit, por tha se Qeveria “Kurti” është duke punuar në këtë drejtim.

Diplomati amerikan deklaroi se Kosova dhe Serbia, së bashku me negociatorin e BE, Miroslav Lajçak duhet të gjejnë zgjidhjen më të pranueshme nga palët. Të martën kryenegociatorët e Kosovës dhe Serbisë nuk ranë dakord për gjetjen e një zgjidhje në takimin e Brukselit.

LEXONI GJITHASHTU:

• Përfundon takimi në Bruksel, Kosova dhe Serbia do dorëzojnë propozime për dinarin
• Osmani: Është arritur dakordësi për një pjesë të propozimit amerikan për dinarin