SHBA ratifikon protokollin për anëtarësimin e Maqedonisë së Veriut në NATO

Senati amerikan ka ratifikuar protokollin për anëtarësimin e Republikës së Maqedonisë së Veriut në NATO, duke u bërë vendi i 25-të i Aleancës së Atlantikut të Veriut që përmbyll këtë procedurë.

Gjatë votimit, 91 senatorë votuan “pro” dhe dy ishin kundër.

Presidenti maqedonas, Stevo Pendarovski, përmes llogarisë zyrtare në Facebook ka falënderuar SHBA-të duke theksuar vazhdimin e partneritetit strategjik amerikano-maqedonas.

Edhe Italia me Britaninë e Madhe kanë ratifikuar protokollin, më 16 tetor. Tani mbeten edhe 4 vende anëtare të kalojnë këtë procedurë: Islanda, Franca, Holanda dhe Spanja.

Shqetësimi kryesor është situata në Spanjë, që për shkak të zgjedhjeve të caktuara për në nëntor do ta ketë jofunksional parlamentin deri në fillim të dhjetorit.

Pritjet janë që anëtarësimi i plotë i Maqedonisë së Veriut në NATO të zyrtarizohet para zgjedhjeve të parakohshme parlamentare, të caktuara për më 12 prill.