SHBA rikthen armët bëthamore në Britani, kërcënon Moska: Do marrim kundërmasa

Shtetet e Bashkuara po planifikojnë të vendosin armë bërthamore në Mbretërinë e Bashkuar, për herë të parë në 15 vjet pasi kërcënimi nga Rusia po rritet.

Kështu sugjerojnë disa dokumente të Pentagonit të publikuara nga gazeta prestigjioze britanike “The Telegraph”.

Kontratat e prokurimit konfirmojnë se SHBA synon të vendosë koka bërthamore tre herë më të forta se bomba e Hiroshimës në bazën ajrore.

Amerika i tërhoqi raketat bërthamore nga Britania e Madhe në vitin 2008, duke gjykuar se kërcënimi i Luftës së Ftohtë nga Moska ishte zvogëluar.

Por tani situata ka ndryshuar dhe vendosja e pajisjeve, si mburojat balistike apo ndërtimi i ambienteve për ushtarët amerikanë në këtë bazë britanike, do të fillojë në muajin qershor.

Publikimi i një lajmi të tillë vjen pas paralajmërimeve të krerëve ushtarakë të NATO-s se vendet anëtare duhet të përgatisin qytetarët e tyre për luftë me Rusinë.

Ndërkohë, rusët janë kundërpërgjigjur përmes zëdhënëses së Ministrisë së Jashtme, Maria Zakharova, duke u shprehur se Moska do të ndërmarrë kundërmasa.

LEXONI GJITHASHTU:

• Zyrtari i NATO-s thirrje Perëndimit: Përgatituni për gjithçka, përfshirë luftën
• 90 mijë trupa, NATO do të zhvillojë stërvitjen më të madhe që nga Lufta e Ftohtë