Shtetet e Bashkuara kanë vendosur sanksione të reja ndaj asaj që e quajnë “flota në hije” e Iranit – një rrjet ndërkombëtar që ndihmon Teheranin të shmangë sanksionet dhe të eksportojë fshehurazi naftë.

Në qendër të këtij rrjeti ndodhet shtetasi indian me bazë në Emiratet e Bashkuara Arabe, Jugwinder Singh Brar, dhe rreth 30 anije të kontrolluara nga kompanitë e tij në Indi dhe Emirate.

Sipas Departamentit amerikan të Thesarit, anijet e Brarit janë përfshirë në dërgesa të paligjshme të naftës iraniane, përmes transferimeve nga anije në anije në ujërat e Gjirit të Omanit, pranë Iranit, Irakut dhe Emirateve. Katër entitete që operojnë anijet – dy në Indi dhe dy në Emirate – u përfshinë gjithashtu në listën e sanksioneve, pasi akuzohen për transport të naftës në emër të Kompanisë Kombëtare iraniane të Naftës dhe të Gardës Revolucionare Islamike.

Sekretari i Thesarit, Scott Bessent, theksoi se ky rrjet transporti dhe ndërmjetësish është thelbësor për financimin e aktiviteteve destabilizuese të Iranit dhe për ndihmën që u ofron grupeve të armatosura që kundërshtojnë SHBA-në dhe Izraelin.

Presidenti Donald Trump, i cili riktheu sanksionet ndaj Iranit pas tërheqjes nga marrëveshja bërthamore në vitin 2018, ka theksuar se qëllimi i SHBA-së është të reduktojë në zero eksportet e naftës së papërpunuar iraniane. Megjithatë, Irani ka rritur eksportet përmes rrugëve të fshehta dhe metodave të shmangies së sanksioneve, si përdorimi i ndërmjetësve, transaksioneve të maskuara dhe ndryshimi i origjinës së naftës.

SHBA-ja ka theksuar se mbetet e përkushtuar për të ndërprerë të gjitha format e eksportit të paligjshëm të naftës nga Irani, duke e konsideruar atë një burim të rëndësishëm të të ardhurave për regjimin dhe për mbështetjen e rrjeteve të tij rajonale.

LEXONI GJITHASHTU:

• Trump: Tarifat mund të rifillojnë nëse marrëveshjet nuk bëhen gjatë pauzës
• OBSH thirrje për angazhim në luftën kundër fruthit, përhapja e tij në 58 shtete