Shehaj: Kandidati jopolitik, e vetmja mundësi për fitoren e Bashkisë së Tiranës

Agron Shehaj ka folur në Euronews Albania, në emisionin “Now me Erla Mëhillin”, lidhur me kandidaturën e mundshme që do të përballet me socialistët për postin e kryetarit të Bashkisë së Tiranës.

Kryetari i Partisë Mundësia u shpreh se vetëm një kandidaturë jopolitike dhe përbashkuese, e mbështetur nga të gjitha partitë opozitare, do të kishte realisht shanse për të fituar në garën për Bashkinë e kryeqytetit.

“Duhet një kandidat jopolitik, i pavarur, që të bashkojë 32 përqindëshin e PD-së, 6 përqindëshin e Partisë Mundësia, 3 përqindëshin e forcës tjetër që vjen pas dhe kështu me radhë. Kjo është e vetmja mënyrë që të mundim Edi Ramën. Nuk ka rëndësi emri tani. Duhet të vendosim nëse jemi dakord me këtë qasje, pastaj emri gjendet, se ka shqiptarë të zotë, të aftë të papëryer në Shqipëri dhe që jetojnë jashtë. Ata që jetojnë jashtë janë të gatshëm të japin kontributin e tyre pa asnjë lloj interesi”, – theksoi Shehaj.

Sipas tij, në kushtet aktuale, e vetmja mënyrë për të pasur shanse përballë mazhorancës është që opozita të përzgjedhë një kandidat teknik, të pavarur, i cili nuk është anëtar i asnjë partie politike dhe që nuk perceptohet si përfaqësues i ndonjë force politike.

“Na duhet një kandidat i përkryer dhe i jashtëzakonshëm, pavarësisht se çfarë mendojnë kryetarët e partive opozitare. Ideja është të gjejmë një kandidat të pavarur, që të përfaqësojë opozitën,” – tha Shehaj.

LEXONI GJITHASHTU:

• Arbër Hitaj: Rama shmang eksperimentet me kabinetin e ri, ja ku po fokusohet
• “Do të nxjerrë opozitën nga llogorja”, Manjani: Rama bëri ofertë të mirëambalazhuar