Shehaj me përfaqësuesit e OSBE: Pakti PS-PD për zgjedhoren, atentat ndaj demokracisë

Kryetari i “Mundësia”, Agron Shehaj, priti këtë të shtunë në selinë e partisë së tij përfaqësues të OSBE-së, ndërsa thotë se u ka shprehur atyre shqetësimin në lidhje me paktin PS-PD për reformën zgjedhore.

Sipas Shehajt, kjo marrëveshje synon eliminimin e alternativave të reja, duke minuar konkurrencën politike dhe pluralizmin në vend.

Kreu i Partisë Mundësia e quajti këtë pakt një “atentat ndaj demokracisë dhe drejtësisë shqiptare” dhe deklaroi se do të bëjë çdo përpjekje për ta ndaluar.

“Shqetësimin tonë për paktin Rama-Berisha për reformën zgjedhore, për eliminimin e alternativave të reja, ia përcollëm zotit Rishi Datta, ekspert i zgjedhjeve pranë OSBE-së dhe ekipit të tij. Partia Mundësia do të luftojë që të ndalojmë këtë atentat ndaj demokracisë dhe drejtësisë shqiptare”, shkruan Shehaj në një postim në Facebook.